ജിദ്ദ: ജിദ്ദയില് വന് വികസന പദ്ധതികള്ക്ക് കളമൊരുങ്ങുന്നു. കഴിഞ്ഞ വര്ഷങ്ങളിലായി പൊളിച്ചുനീക്കിയ കെട്ടിടങ്ങള് നിന്ന സ്ഥലങ്ങളടക്കം 1.4 ദശലക്ഷം ചതുരശ്ര മീറ്ററിലധികം വിസ്തൃതിയുള്ള 29 വ്യത്യസ്ത നിക്ഷേപ അവസരങ്ങളുടെ പുതിയ പാക്കേജ് നഗരസഭ പുറത്തിറക്കി. വാണിജ്യ, വിനോദ, കായിക, പാര്പ്പിട, വിദ്യാഭ്യാസ, വ്യാവസായിക മേഖലകളില് നിക്ഷേപിക്കാനുള്ള അവസരങ്ങളാണ് ഇതില് ഉള്പ്പെടുന്നത്. സമഗ്ര വികസനത്തെ പിന്തുണക്കുന്നതിനും സൗദി വിഷന് 2030 ന്റെ ലക്ഷ്യങ്ങള്ക്കനുസൃതമായി ജീവിതനിലവാരം ഉയര്ത്തുന്നതിനുമുള്ള ശ്രമങ്ങളുടെ ഭാഗമായാണ് ഈ നടപടി.
കടകളും വാണിജ്യ സമുച്ചയങ്ങളും സ്ഥാപിക്കുക, പ്രവര്ത്തിപ്പിക്കുക, പരിപാലിക്കുക എന്നിവക്കായി നീക്കിവച്ചിട്ടുള്ള 13 വാണിജ്യ അവസരങ്ങളാണ് പാക്കേജില് പ്രധാനമായും ഉള്ളത്. ഇതില് ഏറ്റവും ശ്രദ്ധേയമായത് 846,684 ചതുരശ്ര മീറ്റര് വിസ്തീര്ണ്ണത്തിലുള്ള ഒരു സംയോജിത കണ്ടെയ്നര് സിറ്റിയും 429,223 ചതുരശ്ര മീറ്റര് വിസ്തീര്ണത്തിലുള്ള ജിദ്ദ കണ്ടെയ്നര് പാര്ക്കുമാണ്. ഇത് വിപണി ആവശ്യങ്ങള് നിറവേറ്റുകയും വാണിജ്യ പ്രവര്ത്തനങ്ങള് വര്ദ്ധിപ്പിക്കുകയും ചെയ്യും. വ്യാവസായിക പ്രവര്ത്തനങ്ങളില്, ജിദ്ദയുടെ തെക്ക് ഭാഗത്ത് 145,472 ചതുരശ്ര മീറ്റര് വിസ്തീര്ണ്ണത്തില് ഒരു ബാര്ലി പാക്കേജിംഗ്, ഗ്രൈന്ഡിംഗ് പദ്ധതി ആരംഭിക്കുന്നതും ഉള്പ്പെടുന്നു. തൊഴിലാളികള്ക്കായി റെസിഡന്ഷ്യല് കോംപ്ലക്സുകള് സ്ഥാപിക്കുന്നതിന് എട്ട് അവസരങ്ങളും അനുവദിച്ചിട്ടുണ്ട്.
വിനോദ അടിസ്ഥാന സൗകര്യങ്ങള് മെച്ചപ്പെടുത്തുന്നതിനുള്ള പ്രതിബദ്ധതയുടെ ഭാഗമായി, നഗരസഭ പൊതുപാര്ക്കുകള് നിര്മ്മിക്കുന്നതിനുള്ള എട്ട് അവസരങ്ങള് നിര്ദ്ദേശിച്ചിട്ടുണ്ട്. ഇതില് കിന്റര്ഗാര്ട്ടനുകള്, റീട്ടെയില് ഔട്ട്ലെറ്റുകള് തുടങ്ങിയ അനുബന്ധ പ്രവര്ത്തനങ്ങളും ഉള്പ്പെടും. കൂടാതെ, തെക്കന് ഒബ്ഹൂര് ജില്ലയില് ഒരു ഫുഡ് കാര്ട്ട് ഏരിയ സ്ഥാപിക്കുന്നതിനുള്ള ഒരു അവസരവും നിര്ദ്ദേശിച്ചിട്ടുണ്ട്. വിദ്യാഭ്യാസ മേഖലയില്, ഒരു ഹെല്ത്ത് കോളേജ് സ്ഥാപിക്കുന്നതിനുള്ള അവസരവും ഉള്പ്പെടുന്നു.
ഈ നിര്ദ്ദിഷ്ട അവസരങ്ങളുടെ ആകെ വിസ്തീര്ണം 1.4 ദശലക്ഷം ചതുരശ്ര മീറ്ററിലധികം വരും. നിക്ഷേപത്തിനായി അപേക്ഷിക്കാന് ആഗ്രഹിക്കുന്ന നിക്ഷേപകരെ സൗദി സിറ്റീസ് ഇന്വെസ്റ്റ്മെന്റ് പോര്ട്ടലായ 'Foras' വഴി അപേക്ഷിക്കാന് ജിദ്ദ നഗരസഭ ക്ഷണിച്ചു. ലേലം മെയ് 1 മുതല് ആരംഭിച്ചു കഴിഞ്ഞു. 2025 ജൂലൈ 8 വരെ തുടരുമെന്ന് നഗരസഭ അറിയിച്ചു.
Related News
