ദോഹ- യു.എസ് പ്രസിഡന്റ് ഡൊണാള്‍ഡ് ട്രംപ് ഖത്തറിലെ യു.എസ് സൈനികരെ അഭിസംബോധന ചെയ്ത ശേഷം യു.എ.ഇയിലേക്ക് യാത്ര തിരിക്കും. ആര്‍ട്ടിഫിഷ്യല്‍ ഇന്റലിജന്‍സില്‍ ആഗോള നേതാവാക്കാന്‍ യു.എ.ഇ ഭരണാധികാരികള്‍ യു.എസിന്റെ സഹായം പ്രതീക്ഷിക്കുന്നതായാണ് വാര്‍ത്ത.

ഈ വര്‍ഷം മുതല്‍ എന്‍വിഡിയയുടെ ഏറ്റവും നൂതനമായ എഐ ചിപ്പുകള്‍ പ്രതിവര്‍ഷം 500,000 വീതം ഇറക്കുമതി ചെയ്യാന്‍ യു.എ.ഇയുമായി യു.എസിന് കരാറുണ്ട്. ആര്‍ട്ടിഫിഷ്യല്‍ ഇന്റലിജന്‍സ് മോഡലുകള്‍ വികസിപ്പിക്കുന്നതിന് നിര്‍ണായകമായ ഡാറ്റാ സെന്ററുകളുടെ നിര്‍മ്മാണത്തിന് ഈ കരാര്‍ രാജ്യത്തിന് ഉത്തേജനം നല്‍കും.

ഗള്‍ഫ് മേഖലയിലെ ട്രംപിന്റെ നാല് ദിവസത്തെ പര്യടനത്തില്‍ നിരവധി ബിസിനസ് കരാറുകള്‍ ഒപ്പുവെച്ചു. ഖത്തര്‍ എയര്‍വേയ്‌സ് 210 ബോയിംഗ് വൈഡ്ബോഡി ജെറ്റുകള്‍ വാങ്ങുന്നതിനുള്ള കരാര്‍, യു.എസില്‍ നിക്ഷേപം നടത്താന്‍ സൗദി അറേബ്യയുടെ 600 ബില്യണ്‍ ഡോളറിന്റെ പ്രതിബദ്ധത, സൗദി അറേബ്യക്ക് 142 ബില്യണ്‍ ഡോളറിന്റെ യു.എസ് ആയുധ വില്‍പ്പന എന്നിവ ഇതില്‍ ഉള്‍പ്പെടുന്നു.

ഈ യാത്ര നയതന്ത്രപരമായ നീക്കങ്ങള്‍ക്കും സാക്ഷ്യം വഹിച്ചു. സിറിയക്കെതിരായ ദീര്‍ഘകാല ഉപരോധം യു.എസ് നീക്കം ചെയ്യുമെന്ന് ട്രംപ് ചൊവ്വാഴ്ച അപ്രതീക്ഷിതമായി പ്രഖ്യാപിച്ചു. തുടര്‍ന്ന് സിറിയന്‍ ഇടക്കാല പ്രസിഡന്റ് അഹമ്മദ് അല്‍-ഷറായുമായി അദ്ദേഹം കൂടിക്കാഴ്ച നടത്തി.

വ്യാഴാഴ്ച, ദോഹയുടെ തെക്ക് പടിഞ്ഞാറന്‍ മരുഭൂമിയില്‍ സ്ഥിതി ചെയ്യുന്നതും മിഡില്‍ ഈസ്റ്റിലെ ഏറ്റവും വലിയ യു.എസ് സൈനിക കേന്ദ്രമായ അല്‍ ഉദൈദ് എയര്‍ ബേസിലെ യു.എസ് സൈനികരെ ട്രംപ് അഭിസംബോധന ചെയ്യും. തുടര്‍ന്ന് അബുദാബിയിലേക്ക് പറന്ന് യു.എ.ഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാനെയും മറ്റ് നേതാക്കളെയും അദ്ദേഹം സന്ദര്‍ശിക്കും.

ട്രംപിന്റെ യാത്രയുടെ അവസാന ഘട്ടത്തില്‍ എ.ഐ ഒരു പ്രധാന വിഷയമാകും.

മുന്‍ പ്രസിഡന്റ് ജോ ബൈഡന്റെ ഭരണകൂടം മിഡില്‍ ഈസ്റ്റിലേക്കും മറ്റ് പ്രദേശങ്ങളിലേക്കുമുള്ള യു.എസ് എഐ ചിപ്പുകളുടെ കയറ്റുമതിയില്‍ കര്‍ശനമായ മേല്‍നോട്ടം ഏര്‍പ്പെടുത്തിയിരുന്നു. വിലയേറിയ സെമികണ്ടക്ടറുകള്‍ ചൈനയിലേക്ക് വഴിതിരിച്ചുവിടുകയും ബീജിംഗിന്റെ സൈനിക ശക്തി വര്‍ദ്ധിപ്പിക്കുകയും ചെയ്യുമെന്ന ഭയം ബൈഡന്‍ ഭരണകൂടത്തിനുണ്ടായിരുന്നു.

ഗള്‍ഫ് രാജ്യങ്ങളിലെ, പ്രത്യേകിച്ച് യു.എ.ഇയിലെ എല്ലാ ചിപ്പ് ഇടപാടുകളും യാഥാര്‍ത്ഥ്യമാവുകയാണെങ്കില്‍, യുണൈറ്റഡ് സ്റ്റേറ്റ്സിനും ചൈനയ്ക്കും ശേഷം ആഗോള എഐ മത്സരത്തില്‍ ഈ മേഖല മൂന്നാമത്തെ ശക്തികേന്ദ്രമായി മാറും.

റഷ്യ-ഉക്രെയ്ന്‍ ചര്‍ച്ചകളില്‍ പങ്കെടുക്കാന്‍ തുര്‍ക്കിയിലേക്ക് യാത്ര നടത്താനുള്ള സാധ്യത ട്രംപ് സൂചിപ്പിച്ചിരുന്നുവെങ്കിലും് ആ യാത്ര മാറ്റിയതായി യു.എസ് ഉദ്യോഗസ്ഥര്‍ അറിയിച്ചു.