ന്യൂയോര്‍ക്ക്- ഗാസ മുനമ്പില്‍ അതീവ ഗുരുതരമായ മാനുഷിക പ്രതിസന്ധി രൂപപ്പെടുന്നതായി ഐക്യരാഷ്ട്രസഭയുടെ മുന്നറിയിപ്പ്. അടിയന്തര സഹായം എത്തിയില്ലെങ്കില്‍ അടുത്ത 48 മണിക്കൂറിനുള്ളില്‍ 14,000 കുട്ടികള്‍ മരിച്ചേക്കാമെന്ന് യുഎന്‍ വൃത്തങ്ങള്‍ ആശങ്ക പ്രകടിപ്പിച്ചു. ഇസ്രായേല്‍ ഏര്‍പ്പെടുത്തിയിട്ടുള്ള ഉപരോധം ഗാസയിലെ ജനജീവിതം ദുസ്സഹമാക്കുകയും ഭക്ഷ്യവസ്തുക്കളുടെയും മരുന്നുകളുടെയും രൂക്ഷമായ ക്ഷാമം അനുഭവപ്പെടുകയും ചെയ്ത സാഹചര്യത്തിലാണ് ഈ മുന്നറിയിപ്പ്.

അന്താരാഷ്ട്ര സമ്മര്‍ദ്ദം, പ്രത്യേകിച്ച് അമേരിക്കയുടെ, ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹുവിനെ ഉപരോധത്തില്‍ ചെറിയ ഇളവ് വരുത്താന്‍ പ്രേരിപ്പിച്ചിട്ടുണ്ട്. ഇത് പൂര്‍ണ്ണമായ പട്ടിണി ഒഴിവാക്കാനും, ഗാസയിലെ ഇസ്രായേലിന്റെ അധിനിവേശം കൂടുതല്‍ വഷളാക്കുന്നതും പാശ്ചാത്യ ശക്തികളില്‍ നിന്നുള്ള ഉപരോധ ഭീഷണിയും ഒഴിവാക്കാനുമുള്ള ശ്രമത്തിന്റെ ഭാഗമായാണ് വിലയിരുത്തപ്പെടുന്നത്.

ബിബിസി റേഡിയോ 4-ലെ 'ടുഡേ' പരിപാടിയില്‍ യുഎന്‍ മാനുഷിക കാര്യ മേധാവി ടോം ഫ്െളച്ചര്‍ നടത്തിയ വെളിപ്പെടുത്തലുകള്‍ ഞെട്ടിപ്പിക്കുന്നതാണ്. ഇസ്രായേല്‍ ഗാസയിലേക്ക് അനുവദിക്കുന്ന സഹായം വലിയ ആവശ്യകതയുടെ ഒരു ചെറിയ ഭാഗം മാത്രമാണെന്ന് അദ്ദേഹം വ്യക്തമാക്കി. ഇന്നലെ അഞ്ച് ട്രക്ക് സഹായം മാത്രമാണ് ഗാസയിലേക്ക് പ്രവേശിച്ചതെന്ന് ഫ്െളച്ചര്‍ വിശദീകരിച്ചു. ഇത് ഗാസ നിവാസികളുടെ ഏറ്റവും കുറഞ്ഞ അടിയന്തര ആവശ്യങ്ങള്‍ പോലും നിറവേറ്റുന്നില്ലെന്നും അദ്ദേഹം കൂട്ടിച്ചേര്‍ത്തു. കുട്ടികള്‍ക്കുള്ള ഭക്ഷണവും പോഷകങ്ങളും അടങ്ങിയ ഈ ട്രക്കുകള്‍ അതിര്‍ത്തിയുടെ മറുവശത്ത് കുടുങ്ങിക്കിടക്കുകയാണെന്നും അവ അത്യാവശ്യമായി ആവശ്യമുള്ള സാധാരണക്കാരിലേക്ക് എത്തിച്ചേര്‍ന്നിട്ടില്ലെന്നും ഗാര്‍ഡിയന്‍ പത്രം റിപ്പോര്‍ട്ട് ചെയ്തു.

സഹായം സമയബന്ധിതമായി എത്തിയില്ലെങ്കില്‍ 48 മണിക്കൂറിനുള്ളില്‍ 14,000 കുട്ടികള്‍ മരിച്ചേക്കുമെന്ന മുന്നറിയിപ്പ് നല്‍കാന്‍ ഫ്െളച്ചര്‍ മടിച്ചില്ല. 'ഈ 14,000 കുട്ടികളില്‍ കഴിയുന്നത്ര പേരെ അടുത്ത 48 മണിക്കൂറിനുള്ളില്‍ രക്ഷിക്കാന്‍ ഞാന്‍ ആഗ്രഹിക്കുന്നു,' അദ്ദേഹം പറഞ്ഞു. ഈ ഞെട്ടിക്കുന്ന കണക്കിലേക്ക് യുഎന്‍ എങ്ങനെ എത്തിച്ചേര്‍ന്നു എന്ന ചോദ്യത്തിന്, യുഎന്‍ ഫീല്‍ഡ് ടീമുകള്‍ക്ക് അവരുടെ നിരവധി ജീവനക്കാരെ നഷ്ടപ്പെട്ടിട്ടും, അടിയന്തര മാനുഷിക ആവശ്യങ്ങള്‍ വിലയിരുത്തുന്നതിനായി മെഡിക്കല്‍ സെന്ററുകളിലും സ്‌കൂളുകളിലും കഠിനാധ്വാനം ചെയ്യുന്നുണ്ടെന്ന് അദ്ദേഹം ഊന്നിപ്പറഞ്ഞു.