ഗാസ- ഗാസയിലെ ഓരോ കുട്ടിയും, ഓരോ കുഞ്ഞും ശത്രുവാണെന്ന് ഇസ്രായേല് തീവ്ര വലതുപക്ഷ രാഷ്ട്രീയ നേതാവ് മോഷെ ഫെയ്ഗ്ലിന് ബുധനാഴ്ച പ്രഖ്യാപിച്ചത് ഏറെ ചര്ച്ചകള്ക്ക് വഴിവെച്ചിരിക്കുകയാണ്. ഇസ്രായേല് പാര്ലമെന്റിലെ (നെസെറ്റ്) മുന് അംഗമായ ഫെയ്ഗ്ലിന്, ഇസ്രായേല് ടിവി ചാനല് 14-നോട് പറഞ്ഞത്, 'ശത്രു ഹമാസോ ഹമാസിന്റെ സൈനിക വിഭാഗമോ അല്ല. ഗാസയിലെ ഓരോ കുട്ടിയും ശത്രുവാണ്. നമ്മള് ഗാസ പിടിച്ചടക്കി അവിടെ താമസമാക്കണം, ഒരൊറ്റ ഗാസന് കുട്ടിയെയും അവിടെ ശേഷിപ്പിക്കരുത്. മറ്റൊരു വിജയമില്ല' എന്നാണ്.
എന്നാല്, ഈ പ്രസ്താവനകള്ക്ക് മുന്പ്, വിരമിച്ച ഐഡിഎഫ് ഡെപ്യൂട്ടി ചീഫ് ഓഫ് സ്റ്റാഫും പുതുതായി രൂപീകരിച്ച 'ദി ഡെമോക്രാറ്റ്സ്' എന്ന രാഷ്ട്രീയ പാര്ട്ടിയുടെ തലവനുമായ യായര് ഗോലാന്, ഇസ്രായേലിനെ 'വിനോദത്തിനായി കുഞ്ഞുങ്ങളെ കൊല്ലുന്നു' എന്ന് കുറ്റപ്പെടുത്തിയിരുന്നു.
ഒരു പത്രസമ്മേളനത്തില്, ബെഞ്ചമിന് നെതന്യാഹു സര്ക്കാരിന്റെ ഗാസയിലെ നടപടികളെ ഗോലാന് ശക്തമായി വിമര്ശിച്ചു. 'നമ്മള് ഒരു സാധാരണ രാജ്യത്തെപ്പോലെ പ്രവര്ത്തിക്കാന് ശ്രമിച്ചില്ലെങ്കില്, ഇസ്രായേല് ദക്ഷിണാഫ്രിക്കയെപ്പോലെ ഒരു അപര്യാപ്ത രാഷ്ട്രമായി മാറും,' അദ്ദേഹം പറഞ്ഞു. 'ഒരു സാധാരണ രാജ്യം സാധാരണക്കാരോട് യുദ്ധം ചെയ്യില്ല, വിനോദത്തിനായി കുഞ്ഞുങ്ങളെ കൊല്ലില്ല, കൂട്ട പലായനത്തിന് ഇടവരുത്തില്ല - ഗോലാന് കൂട്ടിച്ചേര്ത്തു. നിലവിലെ നേതൃത്വത്തെ 'ധാര്മ്മികതയില്ലാത്തവരും പ്രതിസന്ധി ഘട്ടത്തില് രാജ്യം നയിക്കാന് കഴിവില്ലാത്തവരും, പ്രതികാര മനോഭാവമുള്ളവരുമായി അദ്ദേഹം വിശേഷിപ്പിച്ചു. ഇത് നമ്മുടെ നിലനില്പ്പിന് തന്നെ ഭീഷണിയാണ്.
പ്രധാനമന്ത്രി ബെഞ്ചമിന് നെതന്യാഹു ഗോലാന്റെ പ്രസ്താവനകളെ 'ക്രൂരമായ പ്രകോപനം' എന്നും 'രക്ത കളങ്കം' എന്നും വിശേഷിപ്പിച്ച് തിരിച്ചടിച്ചു. 'നായകരായ നമ്മുടെ സൈനികര്ക്കും ഇസ്രായേല് രാജ്യത്തിനും എതിരായ യായര് ഗോലാന്റെ ക്രൂരമായ പ്രകോപനത്തെ ഞാന് ശക്തമായി അപലപിക്കുന്നു,' നെതന്യാഹു ഒരു പ്രസ്താവനയില് പറഞ്ഞു. 'ഐഡിഎഫ് ലോകത്തിലെ ഏറ്റവും ധാര്മ്മികമായ സൈന്യമാണ്, നമ്മുടെ സൈനികര് നമ്മുടെ നിലനില്പ്പിനായുള്ള യുദ്ധത്തിലാണ് പോരാടുന്നത്.'
ഹമാസിനെ പരാജയപ്പെടുത്താനും ശേഷിക്കുന്ന ബന്ദികളെ മോചിപ്പിക്കാനും ഗാസയുടെ മുഴുവന് പ്രദേശത്തിന്റെയും 'നിയന്ത്രണം ഏറ്റെടുക്കും' എന്ന് തിങ്കളാഴ്ച നെതന്യാഹു പ്രഖ്യാപിച്ചതിന് പിന്നാലെ ഇസ്രായേല് സൈന്യം ഗാസ മുനമ്പിലെ ആക്രമണം ശക്തമാക്കിയിട്ടുണ്ട്.
ഈ വാക്കുകള് ഒരു വശത്ത് രാഷ്ട്രീയമായ തര്ക്കങ്ങള് ഉന്നയിക്കുമ്പോള്, മറുവശത്ത് ഗാസയിലെ നിരപരാധികളായ കുട്ടികളുടെ ജീവിതത്തെക്കുറിച്ചുള്ള വലിയ ആശങ്കകളാണ് ഉയര്ത്തുന്നത്. അവരുടെ ഭാവിയും നിലനില്പ്പും ചോദ്യചിഹ്നമായി തുടരുമ്പോള്, ഈ യുദ്ധം അവരുടെ ജീവിതത്തില് വരുത്തുന്ന മുറിവുകള് എത്രത്തോളമാണെന്ന് ലോകം ഉറ്റുനോക്കുകയാണ്.
Related News
