ദോഹ: 140 കേരളീയ പ്രവാസി സംഘടനയുടെ 2025-28 വർഷത്തേക്കുള്ള ചെയർമാനായി എൻ.എം. ഹാഷിം എറണാകുളം (ഖത്തർ) സത്യപ്രതിജ്ഞ ചെയ്തു ചുമതലയേറ്റു. ഓൺലൈനായി നടന്ന മീറ്റിൽ സംസ്ഥാന പ്രസിഡൻ്റ് മുഹമ്മദ് ഹാഷിം (കോഴിക്കോട്) അധ്യക്ഷത വഹിച്ചു. സംസ്ഥാന ജനറൽ സെക്രട്ടറി മുഹമ്മദ് യുസുഫ് ബൈജു കൊല്ലം (സൗദി) സത്യപ്രതിജ്ഞാ ചടങ്ങുകൾക്ക് നേതൃത്വം നൽകി. സംഘടന അംഗങ്ങളുടെയും, കോർ കമ്മിറ്റി, സംസ്ഥാന കമ്മിറ്റി അംഗങ്ങൾ, സ്ഥിരാംഗങ്ങൾ എന്നിവർ ആശംസകൾ നേർന്നു സംസാരിച്ചു. സംസ്ഥാന ട്രഷറർ സുധർമ്മ കമലാക്ഷി ആലപ്പുഴ (ഖത്തർ) നന്ദി പറഞ്ഞു. ചെയർമാൻ തെരഞ്ഞെടുപ്പ് നിരീക്ഷകരായി സംസ്ഥാന കമ്മിറ്റി അംഗങ്ങളായ വൈശാഖൻ, സുനീർ ഇബ്രാഹിം എന്നിവർ തെരഞ്ഞെടുപ്പ് പ്രക്രിയകൾക്ക് നേതൃത്വം നൽകി. പ്രവാസികളാൽ രൂപീകരിക്കപ്പെട്ട് 2021 ൽ രജിസ്റ്റർ ചെയ്തു പ്രവർത്തിച്ചു വരുന്ന സംഘടന ആണ് 140 കേരളീയ പ്രവാസി സംഘടന. ഇതിനകം തന്നെ ഒരുപാട് പ്രവർത്തനങ്ങൾ നടത്താൻ സംഘടനക്ക് കഴിഞ്ഞിട്ടുണ്ടെന്ന് ഭാരവാഹികൾ പറഞ്ഞു. കേരളീയ പ്രവാസികളുടെയും മുൻപ്രവസികളുടെയും അവരുടെ കുടുംബങ്ങളുടെയും ക്ഷേമ പ്രവർത്തനങ്ങൾ കൂടുതൽ ശക്തമാക്കി പദ്ധതികൾ ആവിഷ്കരിക്കുമെന്ന് സംസ്ഥാന കമ്മിറ്റി അറിയിച്ചു.