ന്യൂദല്ഹി- മെയ് ഏഴിന് പാകിസ്ഥാനുമായുള്ള ഏറ്റുമുട്ടലില് ഇന്ത്യന് വ്യോമസേനക്ക് ചില യുദ്ധവിമാനങ്ങള് നഷ്ടപ്പെട്ടുവെന്ന് ആദ്യമായി സ്ഥിരീകരിച്ച് ചീഫ് ഓഫ് ഡിഫന്സ് സ്റ്റാഫ് (സി.ഡി.എസ്) ജനറല് അനില് ചൗഹാന്. സിംഗപ്പൂരില് ബ്ലൂംബെര്ഗ് ടിവിക്ക് നല്കിയ അഭിമുഖത്തിലാണ് അദ്ദേഹം ഇക്കാര്യം സ്ഥിരീകരിച്ചതെന്ന് ദ വയര് റിപ്പോര്ട്ട് ചെയ്തു. എന്നാല്, ഇന്ത്യക്ക് എത്ര യുദ്ധവിമാനങ്ങള് അന്ന് രാത്രി നഷ്ടപ്പെട്ടുവെന്ന് അദ്ദേഹം കൃത്യമായി പറഞ്ഞില്ല.
സിംഗപ്പൂരില് ഷാംഗ്രി-ലാ ഡയലോഗില് പങ്കെടുക്കുന്നതിനിടെ ശനിയാഴ്ച (മെയ് 30) നല്കിയ അഭിമുഖത്തില് ജനറല് ചൗഹാന് പറഞ്ഞത്, 'വിമാനം തകരുന്നത് പ്രധാനമല്ല, എന്തുകൊണ്ട് അവ തകര്ന്നു എന്നതാണ് പ്രധാനം' എന്നാണ്.
യുദ്ധവിമാനങ്ങളെക്കുറിച്ച് ചോദിച്ചപ്പോള്, 'അവ എന്തുകൊണ്ട് തകര്ന്നു, എന്ത് തെറ്റുകള് സംഭവിച്ചു - അതാണ് പ്രധാനം. എണ്ണം പ്രധാനമല്ല,' എന്നും അദ്ദേഹം പറഞ്ഞു.
അന്ന് രാത്രി ആറ് ഇന്ത്യന് യുദ്ധവിമാനങ്ങള് വെടിവെച്ചിട്ടുവെന്ന പാകിസ്ഥാന്റെ അവകാശവാദം 'തീര്ത്തും തെറ്റാണ്' എന്നും അദ്ദേഹം പറഞ്ഞു.
നാല് ദിവസത്തെ സംഘര്ഷത്തിനിടയിലും അതിനുശേഷവും നടന്ന ഔദ്യോഗിക മാധ്യമ സമ്മേളനങ്ങളില്, വിദേശകാര്യ സെക്രട്ടറി വിക്രം മിസ്രിയും എയര് മാര്ഷല് എ.കെ. ഭാരതിയും (എയര് ഓപ്പറേഷന്സ് ഡയറക്ടര് ജനറല്) നഷ്ടങ്ങള് നിഷേധിച്ചിരുന്നില്ല.
'നമ്മള് ഒരു യുദ്ധ സാഹചര്യത്തിലാണ്, നഷ്ടങ്ങള് യുദ്ധത്തിന്റെ ഭാഗമാണ്' എന്ന് ഭാരതി പറഞ്ഞിരുന്നു. എന്നാല് കൂടുതല് വിവരങ്ങള് വെളിപ്പെടുത്താന് വിസമ്മതിച്ചു. നഷ്ടങ്ങള് സ്ഥിരീകരിക്കുന്ന ആദ്യത്തെ ഉദ്യോഗസ്ഥനാണ് ജനറല് ചൗഹാന്.
ആ നഷ്ടങ്ങളില്നിന്ന് ഇന്ത്യ പാഠം പഠിച്ചുവെന്നും സംഘര്ഷ സമയത്ത് അത് നടപ്പിലാക്കിയെന്നും ജനറല് ഊന്നിപ്പറഞ്ഞു.
'നമ്മള് ചെയ്ത തന്ത്രപരമായ തെറ്റ് മനസ്സിലാക്കാനും, അതിന് പരിഹാരം കാണാനും, അത് തിരുത്താനും, രണ്ട് ദിവസത്തിന് ശേഷം വീണ്ടും നടപ്പിലാക്കാനും, എല്ലാ ജെറ്റുകളും ദീര്ഘദൂര ലക്ഷ്യങ്ങളിലേക്ക് പറത്താനും കഴിഞ്ഞു എന്നത് നല്ല കാര്യമാണ്,' ബ്ലൂംബെര്ഗ് ടിവിയോട് അദ്ദേഹം പറഞ്ഞതായി ദ വയര് റിപ്പോര്ട്ട് ചെയ്യുന്നു.
Related News
