ജിദ്ദ: ഹജ് തീര്ത്ഥാടകര്ക്ക് യാതൊരു ബുദ്ധിമുട്ടുമില്ലാതെയും സുഖകരമായും ഹജ് ചടങ്ങുകള് നിര്വഹിക്കാന് ആവശ്യമായ എല്ലാ ഒരുക്കങ്ങളും സൗദി അറേബ്യ അതിവേഗം പൂര്ത്തിയാക്കുന്നു. തീര്ത്ഥാടകരുടെ സൗകര്യവും അവരുടെ ആത്മീയ അനുഭവം കൂടുതല് മികച്ചതാക്കാനും രാജ്യം ഒരുക്കിയിരിക്കുന്ന വിപുലമായ സംവിധാനങ്ങളെക്കുറിച്ച് ദി ഗാര്ഡിയന് പത്രം ഒരു വീഡിയോ ക്ലിപ്പിലൂടെ വിശദീകരിച്ചു.
വീഡിയോ ദൃശ്യങ്ങളില്, ഫാനുകളില് നിന്നുള്ള ജലകണങ്ങള് ഉപയോഗിച്ച് തീര്ത്ഥാടകര് ചൂടില് നിന്ന് ആശ്വാസം നേടുന്ന കാഴ്ചയുണ്ട്. ഈ ഫാനുകള് തുറന്ന സ്ഥലങ്ങളില് തണുത്ത കാറ്റ് നല്കുകയും ചൂട് കുറയ്ക്കുകയും ചെയ്യുന്നു. ഇത് വിശുദ്ധ ഹറമിലും പുണ്യസ്ഥലങ്ങളിലും എത്തുന്ന തീര്ത്ഥാടകരുടെ ചുട്ടുപൊള്ളുന്ന ചൂടില് നിന്ന് ആശ്വാസം നല്കുന്നു.
'മിസ്റ്റ്-കൂളിംഗ്' സാങ്കേതികവിദ്യ ഉപയോഗിച്ചാണ് ഈ ഫാനുകള് പ്രവര്ത്തിക്കുന്നത്. ഇത് ചെറിയ അളവില് വെള്ളം വായുവിലേക്ക് സ്പ്രേ ചെയ്ത് താപനില ഫലപ്രദമായി കുറയ്ക്കുന്നു. ഈ ഫാനുകള് ഹറമിലും അതിന്റെ മുറ്റങ്ങളിലും, മിനയിലെയും അറഫാത്തിലെയും പുണ്യസ്ഥലങ്ങളിലും ഉള്പ്പെടെ തീര്ത്ഥാടകര് കര്മ്മങ്ങള് നിര്വഹിക്കുന്ന നിരവധി സ്ഥലങ്ങളില് സ്ഥാപിച്ചിട്ടുണ്ട്.
'വരാനിരിക്കുന്ന ഹജ് സീസണിനായുള്ള ഒരുക്കങ്ങളില് കൂളിംഗ് സംവിധാനങ്ങള്, വിശ്രമ സ്ഥലങ്ങള്, മൊബൈല് ഫോണ് ചാര്ജിംഗ് സ്റ്റേഷനുകള് എന്നിവ ഉള്പ്പെടുന്നു. തീര്ത്ഥാടകരുടെ സൗകര്യവും സുരക്ഷയും വര്ദ്ധിപ്പിക്കുക എന്നതാണ് ഇതെല്ലാം ലക്ഷ്യമിടുന്നത്.- സൗദി ഒരുക്കങ്ങളെ പ്രശംസിച്ച് ഗാര്ഡിയന് പറഞ്ഞു.
Related News
