റിയാദ്: സൗദി അറേബ്യയില്‍ മുതിര്‍ന്നവരില്‍ പുകവലി ശീലം ഗണ്യമായി കുറഞ്ഞതായി റിപ്പോര്‍ട്ട്. ഒരു വര്‍ഷത്തിനിടെ 17.5% ല്‍ നിന്ന് 12.4% ആയാണ് പുകവലിക്കാരുടെ എണ്ണം താഴ്ന്നത്. ആരോഗ്യ അധികാരികള്‍ രാജ്യത്ത് നടപ്പാക്കിയ ബോധവല്‍ക്കരണ പരിപാടികളുടെയും പുകയില നിയന്ത്രണ നയങ്ങളുടെയും വിജയമാണ് ഈ കുറവ് സൂചിപ്പിക്കുന്നത്.

ശ്വാസകോശത്തിനപ്പുറം അപകടം

പുകവലിയുടെ ദൂഷ്യഫലങ്ങള്‍ ശ്വാസകോശ രോഗങ്ങളില്‍ മാത്രം ഒതുങ്ങുന്നില്ല. ട്രെന്‍ഡ്എക്സ് റിപ്പോര്‍ട്ട് അനുസരിച്ച്, പുകവലി അല്‍ഷിമേഴ്‌സ് രോഗം വരാനുള്ള സാധ്യത 14% വര്‍ദ്ധിപ്പിക്കാന്‍ സാധ്യതയുണ്ട്. കൂടാതെ, ഓരോ വര്‍ഷവും ആഗോളതലത്തില്‍ 7.2 ദശലക്ഷത്തിലധികം ആളുകളുടെ മരണത്തിന് പുകവലി കാരണമാകുന്നു.

ഞെട്ടിപ്പിക്കുന്ന ആഗോള കണക്കുകള്‍

-ലോകജനസംഖ്യയുടെ 25.3% പുകയില ഉപയോഗിക്കുന്നു.
-ഇവരില്‍ 36.7% പുരുഷന്മാരും 19% സ്ത്രീകളുമാണ്.
-13 നും 15 നും ഇടയില്‍ പ്രായമുള്ള 37 ദശലക്ഷം കുട്ടികള്‍ പുകയില ഉപയോഗിക്കുന്നു.
-പുകവലിയുമായി ബന്ധപ്പെട്ട രോഗങ്ങളുടെ ചികിത്സക്കായി -പ്രതിവര്‍ഷം 1.4 ട്രില്യണ്‍ ഡോളര്‍ ചെലവഴിക്കുന്നു.

സൗദി അറേബ്യയിലെ പ്രാദേശിക സ്ഥിതി

-ജനസംഖ്യയുടെ 33.5% പേരും പുകവലിക്ക് വിധേയരാകുന്നു (പാസീവ് സ്മോക്കിംഗ്).
-വീടുകളില്‍ ഇത് 11.3% ആണ്.
-തുറന്ന സ്ഥലങ്ങളില്‍ 30% പേരും പാസീവ് സ്മോക്കിംഗിന് വിധേയരാകുന്നു.
-രാജ്യത്ത് പ്രതിവര്‍ഷം പുകയിലക്കായി ചെലവഴിക്കുന്ന തുക 55 സ്പെഷ്യലൈസ്ഡ് കാന്‍സര്‍ ആശുപത്രികള്‍ നിര്‍മ്മിക്കുന്നതിന് തുല്യമോ അല്ലെങ്കില്‍ 100,000 വിദേശ സ്‌കോളര്‍ഷിപ്പുകള്‍ക്ക് ധനസഹായം നല്‍കുന്നതിന് തുല്യമോ ആണ്.

പുകയില കമ്പനികള്‍ക്ക് വലിയ ലാഭം കൊയ്യാനാകുന്നുണ്ടെങ്കിലും, ആരോഗ്യ സംവിധാനങ്ങള്‍ക്കും സമൂഹങ്ങള്‍ക്കും ആരോഗ്യപരമായും സാമ്പത്തികമായും സാമൂഹികമായും വലിയ നഷ്ടമാണ് സഹിക്കേണ്ടി വരുന്നത്. ഈ വലിയ അസമത്വം, ഈ മാരക വിപത്ത് തടയാനുള്ള ശ്രമങ്ങള്‍ തുടരേണ്ടതിന്റെ ആവശ്യകതയെ ഓര്‍മ്മിപ്പിക്കുന്നതായി റിപ്പോര്‍ട്ട് പറയുന്നു.