റിയാദ്: ഹജ്, ഉംറ അതിഥി പരിപാടിക്ക് കീഴില് സൗദി അറേബ്യയിലെത്തിയ നിരവധി ഫലസ്തീന് തീര്ത്ഥാടകര് സൗദി അറേബ്യയോട് നന്ദി അറിയിച്ചു. സല്മാന് രാജാവിന്റെ ഈ നീക്കം ലോകമെമ്പാടുമുള്ള മുസ്ലിംകളോടുള്ള അദ്ദേഹത്തിന്റെ സ്നേഹത്തെയാണ് പ്രതിഫലിപ്പിക്കുന്നതെന്നും, തീര്ത്ഥാടകര്ക്ക് ഹജും ഉംറയും മാന്യതയോടും സൗകര്യത്തോടും കൂടി നിര്വഹിക്കാന് അദ്ദേഹം സൗകര്യമൊരുക്കിയെന്നും പലസ്തീന് തീര്ത്ഥാടകര് പറഞ്ഞു.
ഈ വര്ഷത്തെ ഹജിനായി തിരഞ്ഞെടുക്കപ്പെട്ടതില് സന്തോഷം പ്രകടിപ്പിച്ച പലസ്തീന് തീര്ത്ഥാടകനായ അയ്മന് സാലിഹ്, സൗദി നേതൃത്വത്തിന്റെ അസാധാരണ സേവനങ്ങള്ക്കും ഫലസ്തീന് തീര്ത്ഥാടകരെ സ്നേഹപൂര്വ്വം സ്വാഗതം ചെയ്തതിനും നന്ദി അറിയിച്ചു.
മറ്റൊരു ഫലസ്തീന് തീര്ത്ഥാടകനായ ഹുസൈന് കമാല്, മികച്ച സൗകര്യങ്ങളെ പ്രശംസിക്കുകയും, തീര്ത്ഥാടകരെ സേവിക്കുന്നതിനും അവര്ക്ക് ഹജ് സാധ്യമാക്കുന്നതിനും സൗദി ഭരണകൂടം എത്രത്തോളം പ്രതിജ്ഞാബദ്ധമാണെന്ന് ഇത് തെളിയിക്കുന്നുവെന്നും പറഞ്ഞു. സൗദി അറേബ്യയുടെ ഈ ഉദാരമായ സംരംഭത്തിന് അദ്ദേഹം സൗദി നേതൃത്വത്തെ അഭിനന്ദിച്ചു.
സല്മാന് രാജാവിന്റെ അതിഥി പരിപാടിക്ക് കീഴില്, ഫലസ്തീന് രാഷ്ട്രീയ തടവുകാരുടെയും രക്തസാക്ഷികളുടെയും നൂറുകണക്കിന് ബന്ധുക്കളാണ് ഹജ് നിര്വഹിക്കുന്നതിനായി സൗദി അറേബ്യയില് എത്തിച്ചേര്ന്നിരിക്കുന്നത്. തിങ്കളാഴ്ച സൗദി അറേബ്യയുടെ ഇസ്ലാമിക കാര്യ മന്ത്രാലയം 500 തീര്ത്ഥാടകരെ ഗാസയില് നിന്ന് സ്വീകരിച്ചു, ഇതോടെ പലസ്തീനില്നിന്നുള്ള ഹജ് തീര്ത്ഥാടകരുടെ എണ്ണം 1,000 ആയി.
Related News
