ജിദ്ദ: സൗദി റെയില്വേ കമ്പനി (എസ് എ ആര് - സാര്) ഹജ്ജ് സീസണിനായുള്ള പ്രവര്ത്തന പദ്ധതി ഊര്ജിതമാക്കിയതിന്റെ ഭാഗമായി ഹജ്ജ് സന്നാഹങ്ങള് പൂര്ണതോതിലേക്ക് പുരോഗമിക്കവേ ജിദ്ദയില് നിന്ന് മക്കയിലേക്ക് മണിക്കൂര് തോറും സര്വീസ് ആരംഭിച്ചു. ജിദ്ദയിലെ കിംഗ് അബ്ദുല് അസീസ് രാജ്യാന്തര വിമാനത്താവളത്തില് നിന്ന് മക്ക സ്റ്റേഷനിലേക്കാണ് ഓരോ മണിക്കൂറിലും ഹറമൈന് ഹൈ സ്പീഡ് ട്രെയിന് സര്വീസ് നടത്തി കൊണ്ടിരിക്കുന്നത്.
ലോകത്തിലെ ഏറ്റവും വേഗതയേറിയ ഇലക്ട്രിക് ട്രെയിനുകളില് ഒന്നാണിത്, മണിക്കൂറില് 300 കിലോമീറ്റര് വേഗത കൈവരിക്കുന്ന ട്രെയിന് വിമാനത്താവളത്തില് നിന്ന് മക്കയിലേക്കുള്ള യാത്രാ സമയം ഒരു മണിക്കൂറില് താഴെയായി കുറയ്ക്കുന്നു.
ഹജ് സീസണില് തീര്ഥാടകരുടെ ഗതാഗതം സുഗമമാക്കുന്നതിനും സേവന കാര്യക്ഷമത വര്ദ്ധിപ്പിക്കുന്നതിനുമുള്ള ശ്രമങ്ങളുടെ ഭാഗമാണിത്. ഈ സീസണിലെ പ്രവര്ത്തന പദ്ധതിയുടെ ഭാഗമായി 4,700-ലധികം ഷെഡ്യൂള് ചെയ്ത സര്വീസുകള് നടത്തുമെന്ന് സൗദി റെയില്വേ കമ്പനി നേരത്തെ പ്രഖ്യാപിച്ചിരുന്നു. ആഭ്യന്തര തീര്ത്ഥാടകരുടെ എണ്ണത്തില് ഉണ്ടായി കൊണ്ടിരിക്കുന്ന വര്ദ്ധനവും കണക്കിലെടുത്താണ് ജിദ്ദാ വിമാനത്താവള സ്റ്റേഷനില് നിന്ന് മക്കാ റെയില്വേ സ്റ്റേഷനിലേക്കുള്ള ട്രെയിന് സര്വീസുകളുടെ എണ്ണത്തില് വര്ദ്ധനവ് വരുത്തിയത്.
സുഗമമായ പ്രവര്ത്തന നൈരന്തര്യം ഉറപ്പാക്കുകയും തീര്ത്ഥാടകരുടെ വരവ് പോക്കില് ഉയര്ന്ന നിലവാരത്തിലുള്ള സുരക്ഷയും കാര്യക്ഷമതയും കൈവരിക്കുകയും ചെയ്യുകയെന്ന ലക്ഷ്യം കൈവരിക്കുന്നതിന് കിംഗ് അബ്ദുല് അസീസ് അന്താരാഷ്ട്ര വിമാനത്താവളത്തിന്റെ പ്രവര്ത്തന മികവും, എസ് എ ആര് അധികൃതരുമായുള്ള ഏകോപനവും സഹായകരമാവുകയാണ്.
Related News
