മക്ക: പുതിയ ഹിജറ വര്‍ഷാരംഭത്തില്‍ കഅ്ബയെ പുതിയ പുടവ അണിയിക്കുന്നതിനായുള്ള കിസ്‌വ കൈമാറി. സല്‍മാന്‍ രാജാവിനുവേണ്ടി മക്ക ഡെപ്യൂട്ടി ഗവര്‍ണര്‍ അമീര്‍ സഊദ് ബിന്‍ മിശ്അല്‍ ആണ് കഅ്ബയുടെ സുക്ഷിപ്പുകാരന്‍ അബ്ദുല്‍മലിക് ബിന്‍ ത്വഹ അല്‍ശൈബിക്ക് പുതിയ കിസ്വ കൈമാറിയത്. ഇതിനായുള്ള കൈമാറ്റ രേഖയില്‍ ഹജ്ജ്-ഉംറ മന്ത്രിയും ഇരുഹറംകാര്യ ജനറല്‍ പ്രസിഡന്‍സി ഡയറക്ടര്‍ ബോര്‍ഡ് ചെയര്‍മാനുമായ ഡോ. തൗഫീഖ് അല്‍റബീഅയും കഅ്ബയുടെ താക്കോല്‍ സൂക്ഷിപ്പുകാരന്‍ അബ്ദുല്‍മലിക് ബിന്‍ ത്വഹ അല്‍ശൈബിയും ഒപ്പുവെച്ചു.

മുഹറം ഒന്നിന് കിസ്വ മാറ്റിസ്ഥാപിക്കും. അതിനുള്ള തയാറെടുപ്പുകളുടെ ഭാഗമാണ് ഈ കൈമാറ്റ ചടങ്ങ്. കറുത്ത പ്രകൃതിദത്ത പട്ട് ഉപയോഗിച്ചാണ് കഅ്ബയുടെ കിസ്വ കിങ് അബ്ദുല്‍ അസീസ് കിസ്‌വ കോംപ്ലക്സില്‍ നിര്‍മിച്ചത്. ഇതിന് 14 മീറ്റര്‍ ഉയരവും 12 മീറ്റര്‍ നീളവുമുണ്ട്. അതിന്റെ മുകളിലെ മൂന്നിലൊന്ന് ഭാഗത്ത് 95 സെന്റിമീറ്റര്‍ വീതിയും 47 മീറ്റര്‍ നീളവുമുള്ള ഒരു ബെല്‍റ്റ് ഉണ്ട്. ഇസ്ലാമിക അലങ്കാരങ്ങളില്‍ സ്വര്‍ണ, വെള്ളി നൂലുകളില്‍ ഖുര്‍ആന്‍ വചനങ്ങളാല്‍ അലങ്കരിച്ച ചതുരാകൃതിയാല്‍ ചുറ്റപ്പെട്ട 16 കഷ്ണങ്ങള്‍ ഇതില്‍ അടങ്ങിയിരിക്കുന്നു. 200-ഓളം തൊഴിലാളികള്‍ 10 മാസമെടുത്താണ് കിസ്‌വ നിര്‍മിക്കുന്നത്.