ജറൂസലം- ഗാസയിലേക്ക് സഹായങ്ങളുമായി പുറപ്പെട്ട ഫ്രീഡം ഫ്ളോട്ടില്ല കപ്പല് ഇസ്രായേല് സേന തിങ്കളാഴ്ച പുലര്ച്ചെ പിടിച്ചെടുത്തു. കപ്പലിലുണ്ടായിരുന്ന ഗ്രെറ്റ തന്ബെര്ഗ് ഉള്പ്പെടെയുള്ള സന്നദ്ധ പ്രവര്ത്തകരെ കസ്റ്റഡിയിലെടുക്കുകയും ചെയ്തു. ഹമാസുമായുള്ള യുദ്ധത്തിനിടെ ശക്തമാക്കിയ പലസ്തീന് മേഖലയിലെ ഉപരോധം നടപ്പാക്കുകയായിരുന്നു ഇസ്രായേല്.
രണ്ടാം ലോകമഹായുദ്ധത്തിനുശേഷം ഏറ്റവും മാരകവും വിനാശകരവുമായ ഇസ്രായേലിന്റെ ഗാസ മുനമ്പിലെ സൈനിക നടപടിക്കെതിരെയും, മാനുഷിക സഹായങ്ങള് തടയുന്നതിനെതിരെയും പ്രതിഷേധിക്കാനാണ് സന്നദ്ധ പ്രവര്ത്തകര് പുറപ്പെട്ടത്. സൈനിക നടപടി ഏകദേശം രണ്ട് ദശലക്ഷം പലസ്തീനികളെ പട്ടിണിയുടെ വക്കിലെത്തിച്ചിട്ടുണ്ട്.
ഗാസക്ക് സഹായം എത്തിക്കാന് ശ്രമിക്കുന്നതിനിടെ പ്രവര്ത്തകരെ 'ഇസ്രായേല് സേന തട്ടിക്കൊണ്ടുപോയതായി ഫ്രീഡം ഫ്ളോട്ടില്ല പ്രസ്താവനയില് അറിയിച്ചു. 'കപ്പലില് നിയമവിരുദ്ധമായി കയറി, നിരായുധരായ സാധാരണ ജീവനക്കാരെ തട്ടിക്കൊണ്ടുപോവുകയും, കുഞ്ഞുങ്ങള്ക്കുള്ള പാല്പ്പൊടി, ഭക്ഷണം, മരുന്ന് എന്നിവയുള്പ്പെടെയുള്ള ജീവന് രക്ഷാ സാധനങ്ങള് പിടിച്ചെടുക്കുകയും ചെയ്തു- പ്രസ്താവനയില് പറയുന്നു.
ഇസ്രായേല് വിദേശകാര്യ മന്ത്രാലയം യാത്രയെ പബ്ലിക് റിലേഷന്സ് സ്റ്റണ്ട് ആയി ചിത്രീകരിച്ചു. 'സെലിബ്രിറ്റികളുടെ 'സെല്ഫി യാച്ച്' ഇസ്രായേല് തീരങ്ങളിലേക്ക് സുരക്ഷിതമായി എത്തുന്നു,' എന്ന് എക്സില് പങ്കുവെച്ച പോസ്റ്റില് അവര് കുറിച്ചു. കപ്പല് ഇസ്രായേലിലെ അഷ്ദോദ് തുറമുഖത്ത് എത്തിയിട്ടുണ്ട്.
