ദോഹ: ഖത്തറില് നിന്നും കെനിയയിലെത്തിയ വിനോദയാത്രാ സംഘം അപകടത്തില്പെട്ട് മരണമടഞ്ഞ ആറു പേരില് മലയാളികളും ഉള്പ്പെട്ടതായി സംശയിക്കുന്നു. എന്നാല്, ഇവരെ തിരിച്ചറിയാന് കഴിഞ്ഞിട്ടില്ല. പരിക്കേറ്റവരിലും നിരവധി മലയാളികളുണ്ട്. ഗുരുതരമായി പരിക്കേറ്റ മൂന്നുപേരെ കെനിയന് തലസ്ഥാനമായ നയ്റോബിയിലെത്തിക്കാനുള്ള ശ്രമത്തിലാണെന്ന് ട്രാവല് ഏജന്സിയുമായി ബന്ധപ്പെട്ടവര് അറിയിച്ചു.
പാലക്കാട്, തൃശ്ശൂര് ജില്ലകളില് നിന്നുള്ള രണ്ട് കുടുംബങ്ങള് പരിക്കേറ്റവരുടെ പട്ടികയിലുണ്ട്. പാലക്കാട് ജില്ലയില് നിന്നുള്ള ജോയല്, മകന് ട്രാവിസ് എന്നിവരെ പരിക്കുകളോടെ പ്രാദേശിക ആശുപത്രിയില് പ്രവേശിപ്പിച്ചു. ജോയലിന്റെ ഭാര്യ റിയ, മകള് ടൈര എന്നിവര്ക്കും പരിക്കുണ്ട്. തൃശ്ശൂര് ജില്ലയില് നിന്നുള്ള മുഹമ്മദ് ഹനീഫക്കും അപകടത്തില് പരിക്കേറ്റു. ഭാര്യ ജെസ്ന കുറ്റിക്കാട്ട്ചാലില്, മകള് റൂഹി മെഹറിന് എന്നിവര്ക്കും അപകടത്തില് പരിക്കേറ്റിട്ടുണ്ട്. എന്നാല് പരിക്കേറ്റവരെ പ്രവേശിപ്പിച്ച ആശുപത്രിയെക്കുറിച്ചോ പരിക്കിന്റെ ഗുരുതരാവസ്ഥയെ കുറിച്ചോ കൂടുതല് വിവരം ലഭ്യമല്ല.
തിങ്കളാഴ്ച പ്രാദേശിക സമയം വൈകുന്നേരം നാലുമണിയോടെയാണ് വടക്കുകിഴക്കന് കെനിയയിലെ ന്യാന്ഡറുവ പ്രവിശ്യയില് ഖത്തറില് നിന്നുള്ള 28 പേരുടെ സംഘം സഞ്ചരിച്ച ബസ് അപകടത്തില്പെട്ടത്. കര്ണാടക, ഗോവ, കേരളം ഉള്പ്പെടെ വിവിധ ഇന്ത്യന് സംസ്ഥാനങ്ങളില് നിന്നുള്ളവരാണ് യാത്രാ സംഘത്തിലുണ്ടായിരുന്നത്. ആശുപത്രിയില് പ്രവേശിക്കപ്പെട്ടവര്ക്ക് സഹായങ്ങളുമായി കെനിയയിലെ കേരള അസോസിയേഷന് പ്രവര്ത്തകര് രംഗത്തുണ്ട്. രാവിലെയോടെ ഖത്തറില് നിന്നും ട്രാവല് ഏജന്സി പ്രതിനിധികളും സ്ഥലത്തെത്തിയിട്ടുണ്ട്. നയ്റോബിയില് നിന്നും 200ഓളം കിലോമീറ്റര് ദൂരെയായാണ് അപകടം നടന്നത്.
കനത്ത മഴയില് നിയന്ത്രണം വിട്ട ബസ് തെന്നിനീങ്ങി താഴ്ചയിലേക്ക് മറിയുകയായിരുന്നുവെന്നും പ്രാദേശിക മാധ്യമങ്ങള് റിപ്പോര്ട്ട് ചെയ്തു. ബസിന്റെ മേല്കൂരകള് തകര്ന്ന നിലയിലാണ് താഴെ പതിച്ചത്. തിങ്കളാഴ്ച ഉച്ചകഴിഞ്ഞ് നകുരുവില് നിന്ന് ലൈക്കിപിയ പ്രദേശത്തെ ന്യാഹുരു തോംസണ് വെള്ളച്ചാട്ടത്തിലേക്ക് വിനോദസഞ്ചാരികളെ കൊണ്ടുപോയിരുന്ന ബസാണ് അപകടത്തില് പെട്ടത്. ഖത്തറില് നിന്നും പെരുന്നാള് അവധി ആഘോഷിക്കാന് ജൂണ് ആറിനാണ് വിനോദയാത്രാ സംഘം ട്രാവല് ഏജന്സിക്കു കീഴില് യാത്രതിരിച്ചത്. ബുധനാഴ്ച ദോഹയില് തിരിച്ചെത്തേണ്ട സംഘമാണ് അപകടത്തില്പ്പെട്ടത്.
Related News
