ജിദ്ദ- മിന, മുസ്ദലിഫ, അറഫാത്ത് എന്നിവിടങ്ങളിലെ തീര്‍ത്ഥാടകരെ വിജയകരമായി ലക്ഷ്യങ്ങളിലെത്തിച്ച് സൗദി റെയില്‍വേ. ദുല്‍ഹജ്ജ് ഏഴ് മുതല്‍ തിങ്കളാഴ്ച സൂര്യാസ്തമയം വരെ (ദുല്‍ഹജ്ജ് 13) മണിക്കൂറില്‍ 11,130 യാത്രക്കാര്‍ എന്ന നിരക്കില്‍ ഏകദേശം 1.87 ദശലക്ഷം തീര്‍ത്ഥാടകരെയാണ് ട്രെയിന്‍ വഴി എത്തിച്ചത്.

വിവിധ അധികൃതരുമായി നടത്തിയ മികച്ച ഏകോപനത്തിലൂടെ 2,154 ട്രിപ്പുകളാണ് സര്‍വീസ് നടത്തിയത്. ഹജ്ജ് സീസണിലെ മെട്രോ ട്രെയിനിന്റെ പ്രവര്‍ത്തന പദ്ധതിയില്‍ അഞ്ച് പ്രധാന ഘട്ടങ്ങളാണുണ്ടായിരുന്നത്.

ഒന്നാം ഘട്ടം: ദുല്‍ഹജ്ജ് ഏഴിന് എല്ലാ സ്റ്റേഷനുകള്‍ക്കുമിടയില്‍ ട്രെയിന്‍ സര്‍വീസ് ആരംഭിച്ചു. ദുല്‍ഹജ്ജ് എട്ടിന് സൂര്യാസ്തമയം വരെ ഇത് തുടര്‍ന്നു. ഈ ഘട്ടത്തില്‍ 27,000-ത്തിലധികം തീര്‍ത്ഥാടകരെയാണ് എത്തിച്ചത്.

രണ്ടാം ഘട്ടം: മിനയില്‍ നിന്ന് അറഫാത്തിലേക്ക് 282,000 തീര്‍ത്ഥാടകരെ എത്തിച്ചു.
മൂന്നാം ഘട്ടം: അറഫാത്തില്‍ നിന്ന് മുസ്ദലിഫയിലേക്ക് 294,000 തീര്‍ത്ഥാടകരെ എത്തിച്ചു.

നാലാം ഘട്ടം: മുസ്ദലിഫയില്‍ നിന്ന് മിനയിലേക്ക് 349,000-ത്തിലധികം തീര്‍ത്ഥാടകരെ എത്തിച്ചു.
അഞ്ചാം ഘട്ടം: തഷ്‌രീഖ് ദിവസത്തിലെ അവസാന സൂര്യാസ്തമയം വരെ നീണ്ടുനിന്ന ഈ ഘട്ടത്തില്‍, മിന സ്റ്റേഷന്‍ 3 (ജമറാത്ത്) ലേക്ക് 920,000-ത്തിലധികം യാത്രക്കാരെ എത്തിക്കുകയും തിരികെ കൊണ്ടുപോവുകയും ചെയ്തു.