അബുദാബി: യുഎഇ ഇന്‍ഷുറന്‍സ് മേഖലയില്‍ സ്വദേശിവല്‍ക്കരണം ശക്തമാക്കുന്നു. 2027-2030 കാലയളവില്‍ 50% മുതല്‍ 60% വരെ സ്വദേശിവല്‍ക്കരണമാണ് ലക്ഷ്യമിടുന്നത്. കമ്പനിയുടെ വലുപ്പം അനുസരിച്ചാണ് സ്വദേശിവല്‍ക്കരണ അനുപാതം കണക്കാക്കുക. സ്വദേശിവല്‍ക്കരണം പാലിക്കുന്നെന്ന് ഉറപ്പാക്കാനും കൃത്രിമം തടയാനും പ്രത്യേക സമിതിയെയും നിയമിച്ചിട്ടുണ്ട്. നിയമം പാലിക്കാത്ത കമ്പനിക്ക് 60,000 ദിര്‍ഹം പിഴ ചുമത്തും. സ്വദേശിവല്‍ക്കരണം ഊര്‍ജിതമാക്കുന്നത് ഈ രംഗത്ത് ജോലി ചെയ്യുന്ന മലയാളികള്‍ ഉള്‍പ്പെടെയുള്ള വിദേശികളെ സാരമായി ബാധിച്ചേക്കും. ഈ രംഗത്ത് കൂടുതലും വിദേശികളാണ്. ഇതില്‍ നല്ല പങ്കും മലയാളികളും.

2 മുതല്‍ 19 വരെ ജീവനക്കാരുള്ള കമ്പനികളില്‍ വര്‍ഷത്തില്‍ കുറഞ്ഞത് ഒരു സ്വദേശിയെ നിയമിക്കണമെന്ന് പുതിയ നിയമം വ്യവസ്ഥ ചെയ്യുന്നു. ഇരുപതോ അതില്‍ കൂടുതലോ ജീവനക്കാരുള്ള കമ്പനികളില്‍ 30% സ്വദേശിവല്‍ക്കരണം നടപ്പാക്കണം. സ്ഥാപനത്തിന്റെ നിര്‍ണായക പദവികളില്‍ 45%, സിഇഒ അല്ലെങ്കില്‍ ജനറല്‍ മാനേജര്‍ തസ്തികകളില്‍ 30% സ്വദേശിവല്‍ക്കരണം എന്നിങ്ങനെയാണ് നിയമം അനുശാസിക്കുന്നത്. യുഎഇ സാമ്പത്തിക കാര്യ സഹമന്ത്രി മുഹമ്മദ് അല്‍ ഹുസൈനി ഫെഡറല്‍ നാഷനല്‍ കൗണ്‍സിലിലാണ് (എഫ്എന്‍സി) ഇക്കാര്യം അറിയിച്ചത്.

നിലവില്‍ ഇന്‍ഷുറന്‍സ് മേഖലയിലെ 9,773 ജീവനക്കാരുണ്ട്. ഇതില്‍ 22.09% (2,159 പേര്‍) സ്വദേശികളാണ്. 2026നകം സ്വദേശിവല്‍ക്കരണ തോത് 30% ആക്കി ഉയര്‍ത്തുമെന്ന് മന്ത്രി വ്യക്തമാക്കി.