അഹമ്മദാബാദ്: ഗുജറാത്തിലെ അഹമ്മദാബാദിലുണ്ടായ വിമാന ദുരന്തത്തില്‍ ഒരാള്‍ അത്ഭുതകരമായി രക്ഷപ്പെട്ടതായി റിപ്പോര്‍ട്ട്. വിമാനത്തിലുണ്ടായിരുന്ന 242 പേരും മരിച്ചെന്ന സ്ഥിരീകരണത്തിനിടെയാണ് ആശ്വാസകരമായ വാര്‍ത്ത. രമേശ് വിശ്വാസ് കുമാര്‍ എന്ന 38 കാരനാണ് രക്ഷപ്പെട്ടത്. പരിക്കേറ്റ ഇദ്ദേഹം ആശുപത്രിയിലാണ്. തകര്‍ന്ന വിമാനത്തില്‍ നിന്ന് എമര്‍ജന്‍സി വാതിലിലൂടെ രക്ഷപ്പെട്ടോടിയ രമേഷിന് മുഖത്തടക്കം മുറിവുകളുണ്ടെങ്കിലും നടന്നാണ് രക്ഷാപ്രവര്‍ത്തരോടൊപ്പം ആംബുലന്‍സില്‍ കയറിയത്. ഇതിന്റെ ദൃശ്യങ്ങള്‍ മാധ്യമങ്ങളില്‍ പുറത്തുവന്നു.

നേരത്തെ, യാത്രക്കാരില്‍ ആരുടെയും ജീവന്‍ രക്ഷിക്കാന്‍ സാധിച്ചില്ലെന്ന് അഹ്‌മദാബാദ് പൊലീസ് സ്ഥിരീകരിച്ചിരുന്നു. 242 പേരാണ് വിമാനത്തിലുണ്ടായിരുന്നത്. ഗുജറാത്ത് മുന്‍ മുഖ്യമന്ത്രി വിജയ് രൂപാണി മലയാളി നഴ്‌സ് രഞ്ജിതയും മരിച്ചവരില്‍ ഉള്‍പ്പെടും. യാത്രക്കാരില്‍ 169 പേര്‍ ഇന്ത്യന്‍ പൗരത്വവും 53 പേര്‍ ബ്രിട്ടീഷ് പൗരത്വവും 7 പേര്‍ പോര്‍ച്ചുഗീസ് പൗരത്വവും ഒരാള്‍ കനേഡിയന്‍ പൗരത്വവും ഉള്ളവരാണ്.

കേന്ദ്ര ആഭ്യന്തര മന്ത്രി അമിത് ഷാ സംഭവ സ്ഥലത്ത് എത്തിയിട്ടുണ്ട്. കേന്ദ്ര വ്യോമയാന മന്ത്രിയും സംഭവം നടന്ന ഉടന്‍ സ്ഥലത്തെത്തിയിരുന്നു.