അഹ്‌മദാബാദ്: അഹ്‌മദാബാദിലെ എയര്‍ ഇന്ത്യ വിമാന ദുരന്ത സ്ഥലത്ത് പ്രധാനമന്ത്രി നരേന്ദ്ര മോദി എത്തി. ഇന്ന് രാവിലെ 8.30ഓടെയാണ് പ്രധാനമന്ത്രി വിമാനത്താവളത്തിലിറങ്ങിയത്. വിമാനം തകര്‍ന്ന സ്ഥലവും ഹോസ്റ്റല്‍ കെട്ടിടവും അദ്ദേഹം സന്ദര്‍ശിച്ചു. പരിക്കേറ്റവര്‍ ചികിത്സയിലുള്ള ആശുപത്രിയിലും പ്രധാനമന്ത്രി എത്തി.

കേന്ദ്ര ആഭ്യന്തര മന്ത്രി അമിത് ഷാ ഇന്നലെ അപകട സ്ഥലം സന്ദര്‍ശിച്ചിരുന്നു. പരിക്കേറ്റവര്‍ ചികിത്സയിലുള്ള ആശുപത്രിയും സന്ദര്‍ശിച്ച ആഭ്യന്തര മന്ത്രി, കേന്ദ്രവും സംസ്ഥാനവും സംയുക്തമായി ഇടപെട്ട് രക്ഷാപ്രവര്‍ത്തനം നടത്തിയതായും രാജ്യം ഒന്നാകെ മരിച്ചവരുടെ പ്രിയപ്പെട്ടവര്‍ക്കൊപ്പമാണെന്നും പറഞ്ഞിരുന്നു. കേന്ദ്ര വ്യോമയാന മന്ത്രിയും സംഭവ സ്ഥലത്തെത്തിയിരുന്നു.


എയര്‍ ഇന്ത്യ വിമാനാപകടത്തില്‍ മരിച്ചവരുടെ കുടുംബങ്ങള്‍ക്ക് ഒരു കോടി രൂപ വീതം നല്‍കുമെന്ന് ടാറ്റ ഗ്രൂപ് പ്രഖ്യാപിച്ചിട്ടുണ്ട്. പരിക്കേറ്റവരുടെ ചികിത്സാ ചെലവുകളും ടാറ്റ ഗ്രൂപ് വഹിക്കും. ദാരുണമായ സംഭവത്തില്‍ വളരെയധികം ദുഃഖിതരാണെന്നും പ്രിയപ്പെട്ടവരെ നഷ്ടപ്പെട്ട കുടുംബങ്ങള്‍ക്കും പരിക്കേറ്റവര്‍ക്കുമൊപ്പം തങ്ങളുടെ ചിന്തകളും പ്രാര്‍ഥനകളുമുണ്ടെന്നും ടാറ്റ ഗ്രൂപ്പിന്റെയും എയര്‍ ഇന്ത്യയുടെയും ചെയര്‍മാന്‍ എന്‍. ചന്ദ്രശേഖരന്‍ പറഞ്ഞു.