ടെഹ്റാന്: ഇറാനു നേരെ ഇസ്രായേലിന്റെ വ്യോമാക്രമണം. തലസ്ഥാന നഗരമായ തെഹ്റാന് ഉള്പ്പെടെയുള്ള നഗരങ്ങളിലാണ് ഇസ്രായേല് ആക്രമണം നടത്തിയത്. ഇറാന്റെ സൈനിക, ആണവ കേന്ദ്രങ്ങളെ ലക്ഷ്യമിട്ടാണ് വെള്ളിയാഴ്ച പുലര്ച്ചെ ആക്രമണം. ഇസ്രയേല് നടത്തിയ വ്യോമാക്രമണത്തില് ഇറാന്റെ സംയുക്ത സൈനിക മേധാവി മുഹമ്മദ് ബാഗേരിയും ഇറാന് റെവല്യൂഷണറി ഗാര്ഡ് കോര് (ഐആര്ജിസി) മേധാവി ഹൊസൈന് സലാമിയും കൊല്ലപ്പെട്ടതായി റിപ്പോര്ട്ടുണ്ട്. ഇറാനെതിരെ ഇസ്രയേല് പ്രധാനമന്ത്രി പ്രഖ്യാപിച്ച ഓപ്പറേഷന് റൈസിങ് ലയണില് കൊല്ലപ്പെട്ടവരില് ബാഗേരിയും സലാമിയും ഉള്പ്പെടുന്നതായി രാജ്യാന്തര മാധ്യമങ്ങളാണ് റിപ്പോര്ട്ട് ചെയ്തത്. ഇറാന് തലസ്ഥാനമായ ടെഹ്റാനില് മാത്രം 6 സ്ഫോടനങ്ങള് നടന്നെന്നും ഇറാന്റെ ആണവ പ്ലാന്റുകള് ലക്ഷ്യമിട്ടാണ് ആക്രമണം നടത്തിയതെന്നും ഇസ്രയേല് ഡിഫന്സ് ഫോഴ്സ് അറിയിച്ചു.
ഇറാനുനേരെ സൈനിക നടപടി ആരംഭിച്ചതായി ഇസ്രായേല് പ്രധാനമന്ത്രി ബിന്യമിന് നെതന്യാഹു അറിയിച്ചു. നേരത്തെ തന്നെ, ഇറാനെ ഇസ്രായേല് ആക്രമിക്കുമെന്ന് റിപ്പോര്ട്ടുകളുണ്ടായിരുന്നു. ഏതാനും ദിവസങ്ങളായി അമേരിക്കയുടെ സമ്മതമില്ലാതെ ഇസ്രായേല് ഇറാന്റെ ആണവ കേന്ദ്രങ്ങള് ആക്രമിക്കാന് തീരുമാനിച്ചേക്കുമെന്ന് നേരത്തെ യു.എസ് ഇന്റലിജന്സ് റിപ്പോര്ട്ട് ചെയ്തിരുന്നു. ഇറാന് ആക്രമണത്തിനു പിന്നാലെ ഇസ്രായേലില് അടിയാന്തരാവസ്ഥ പ്രഖ്യാപിച്ചു. ഇസ്രായേലിന്റേത് ഏകപക്ഷീയമായ നടപടിയാണെന്ന് യു.എസ് സ്റ്റേറ്റ് സെക്രട്ടറി മാര്കോ റൂബിയോ പ്രതികരിച്ചു. അമേരിക്കന് പ്രസിഡന്റ് ഡോണള്ഡ് ട്രംപ് വെള്ളിയാഴ്ച രാവിലെ ദേശീയ സുരക്ഷ കൗണ്സിലിന്റെ അടിയന്തര യോഗം വിളിച്ചുചേര്ത്തിട്ടുണ്ട്. ഇസ്രായേലിന്റെ ആണവ പദ്ധതി രഹസ്യങ്ങള് ചോര്ത്തിയെടുത്തുവെന്നും വൈകാതെ പുറത്തുവിടുമെന്നും കഴിഞ്ഞദിവസം ഇറാന് മുന്നറിയിപ്പ് നല്കിയിരുന്നു.
Related News
