മദീന- ഇക്കൊല്ലത്തെ ബലിപ്പെരുന്നാള്‍ അവധിക്കാലത്ത് മദീനയില്‍ സന്ദര്‍ശകരുടെ അഭൂതപൂര്‍വമായ തിരക്ക് അനുഭവപ്പെട്ടു. ജൂണ്‍ അഞ്ചിന് ആരംഭിച്ച അറഫാ ദിനത്തിനും ശേഷവും നീണ്ടുനിന്ന അവധിക്കാലം പ്രയോജനപ്പെടുത്തി സ്വദേശികളും വിദേശികളും ഒരുപോലെ മദീനയെ തങ്ങളുടെ പ്രിയപ്പെട്ട യാത്രാ ലക്ഷ്യസ്ഥാനമാക്കി മാറ്റി.

പ്രവാചകന്റെ മസ്ജിദിനോട് ചേര്‍ന്നുള്ള ഹോട്ടലുകളില്‍ 92 ശതമാനത്തിലധികം മുറികളും നിറഞ്ഞു. വിവിധതരം താമസ പാക്കേജുകളും സന്ദര്‍ശകരുടെ താല്‍പ്പര്യങ്ങള്‍ക്കനുസരിച്ചുള്ള സൗകര്യങ്ങളും ലഭ്യമായിരുന്നു. ഈദ് അവധിക്കാലത്ത് പ്രിന്‍സ് മുഹമ്മദ് ബിന്‍ അബ്ദുല്‍ അസീസ് അന്താരാഷ്ട്ര വിമാനത്താവളത്തില്‍ 1,80,000-ല്‍ അധികം യാത്രക്കാര്‍ എത്തിയതായി കണക്കുകള്‍ വ്യക്തമാക്കുന്നു. ഇത് മദീനയുടെ വളരുന്ന ടൂറിസം മേഖലയുടെ വ്യക്തമായ സൂചനയാണെന്ന് അധികൃതര്‍ പറഞ്ഞു.

സൗദി അറേബ്യയിലെ ഏറ്റവും തിരക്കേറിയ വിമാനത്താവളങ്ങളിലൊന്നാണ് പ്രിന്‍സ് മുഹമ്മദ് ബിന്‍ അബ്ദുല്‍ അസീസ് അന്താരാഷ്ട്ര വിമാനത്താവളം. 2024-ല്‍ ഏകദേശം 10 ദശലക്ഷം യാത്രക്കാരെയും 72,000-ത്തിലധികം വിമാന സര്‍വീസുകളെയും ഇത് കൈകാര്യം ചെയ്തു. ലോകത്തിലെ മികച്ച 50 വിമാനത്താവളങ്ങളില്‍ ഒന്നാണ് മദീന എയര്‍പോര്‍ട്ട്്.

സാംസ്‌കാരിക മന്ത്രാലയവും സിറ്റി ഡെവലപ്‌മെന്റ് അതോറിറ്റിയും ചേര്‍ന്ന് ഈദ് അവധിക്കാലത്ത് വിപുലമായ പരിപാടികള്‍ സംഘടിപ്പിച്ചിരുന്നു. പൈതൃക ഭക്ഷണമേളകള്‍, തുറന്ന കമ്പോളങ്ങള്‍, കരകൗശല പ്രദര്‍ശനങ്ങള്‍, കുടുംബ വിനോദ കേന്ദ്രങ്ങള്‍ എന്നിവ ഇതില്‍ ഉള്‍പ്പെടുന്നു. ഇത് സന്ദര്‍ശകര്‍ക്ക് സവിശേഷമായ സാംസ്‌കാരിക വിനോദാനുഭവം നല്‍കി.

ആത്മീയതയും ആതിഥ്യമര്യാദയും മികച്ച സേവനങ്ങളും സമന്വയിപ്പിച്ച്, ആഭ്യന്തര വിനോദസഞ്ചാര ഭൂപടത്തില്‍ മദീന ഒരു പ്രധാന ലക്ഷ്യസ്ഥാനമായി അതിന്റെ സ്ഥാനം ശക്തിപ്പെടുത്തുകയാണ്. ഈ സീസണ്‍ പ്രാദേശിക ടൂറിസത്തില്‍ റെക്കോര്‍ഡ് നേട്ടങ്ങള്‍ കൈവരിക്കുമെന്നാണ് പ്രതീക്ഷിക്കുന്നത്.