ടെഹ്റാന്: ഇറാനെതിരെ ആക്രമണം നടത്തിയ ഇസ്രായേലിനെതിരെ ഇറാന് തിരിച്ചടി ആരംഭിച്ചു. ഇതോടെ പശ്ചിമേഷ്യ വീണ്ടും സംഘര്ഷ മേഖലയായി. ഇസ്രായേലിനെതിരെ ഉറപ്പായും തിരിച്ചടി ഉണ്ടാകുമെന്ന് ഇറാന് വ്യക്തമാക്കി മണിക്കൂറുകള്ക്കകമാണ് ആക്രമണം. 100 ഡ്രോണുകള് ഉപയോഗിച്ച് ഇസ്രായേലില് ആക്രമണം നടത്തിയതായി റിപ്പോര്ട്ടുണ്ട്.
ഇസ്രായേലിന് നേരെ ഇറാന് നൂറിലധികം ഡ്രോണുകള് വിക്ഷേപിച്ചതായി ഇസ്രായേല് സൈന്യം അറിയിച്ചു. ആക്രമണം തടയാന് ഇസ്രായേല് സൈന്യം നടപടികള് സ്വീകരിച്ചതായി ഇസ്രായേലി പ്രതിരോധ സേന വൃത്തങ്ങള് വ്യക്തമാക്കി. ഇറാനില് നടത്തിയ ആക്രമണങ്ങള്ക്ക് ഇസ്രയേല് കഠിനമായ ശിക്ഷ നേരിടേണ്ടിവരുമെന്ന് ഇറാന് പരമോന്നത നേതാവ് ആയത്തുല്ല അലി ഖാംനഈ വ്യക്തമാക്കിയിരുന്നു.
വെള്ളിയാഴ്ച പുലര്ച്ചെ 3.30ന് ആയിരുന്നു തെഹ്റാനില് ഇസ്രായേലിന്റെ വ്യോമാക്രണം. രാജ്യത്തിന്റെ പരമാധികാരത്തിന് നേരെ നടത്തിയ ആക്രമണത്തില് ഇസ്രയേലിന് വലിയ വില നല്കേണ്ടി വരുമെന്ന് ഇറാന് സൈനിക വക്താവ് അബൊള്ഫാസല് ഷെകാര്ചി മുന്നറിയിപ്പ് നല്കി. 'ഓപറേഷന് റൈസിങ് ലയണ്' എന്ന പേര് നല്കിയാണ് ഇറാനിലേക്ക് ഇസ്രായേല് ആക്രമണം നടത്തിയത്. ഇറാന്റെ സൈനിക കേന്ദ്രങ്ങളും ആക്രമിച്ചതായി ഇസ്രായേല് വ്യക്തമാക്കിയിട്ടുണ്ട്. അഞ്ച് സ്ഥലങ്ങളില് സ്ഫോടനം നടന്നതായി ഇറാന് മാധ്യമങ്ങള് റിപ്പോര്ട്ട് ചെയ്തു.
Related News
