റിയാദ്: അഹമ്മദാബാദിലുണ്ടായ രാജ്യത്തെ നടുക്കിയ വിമാന ദുരന്തത്തില് റിയാദ് ഒഐസിസി അനുശോചിച്ചു. 242 പേരുമായി ലണ്ടനിലേക്ക് പറന്നുയര്ന്ന് നിമിഷ നേരം കൊണ്ട് തന്നെ താഴേക്ക് പതിക്കുകയും തീഗോളമായി കത്തിയമരുകയും ചെയ്തതിനെ തുടര്ന്ന് വിമാനത്തില് ഉണ്ടായിരുന്ന 241 പേര് കൊല്ലപ്പെടുകയും വിമാനത്തില് ഉണ്ടായിരുന്നവര്ക്ക് പുറമെ അഞ്ച് മെഡിക്കല് വിദ്യാര്ത്ഥികളും ദാരുണമായി കൊല്ലപ്പെട്ട സംഭവം അതീവ ദുഖകരമാണ്. അതോടൊപ്പം നിരവധി ആളുകള്ക്ക് പരിക്ക് പറ്റുകയും ചെയ്തത് ഏറെ സങ്കടപ്പെടുത്തി. മരിച്ചവരുടെ കുടുംബത്തിന്റെ ദുഃഖത്തില് പങ്ക് ചേരുന്നതായും, അതോടൊപ്പം പരിക്ക് പറ്റി ചികിത്സയിലുള്ളവര് എത്രയും വേഗം സുഖം പ്രാപിക്കട്ടെയെന്ന് ആശംസിക്കുകയും ഒരാള്മാത്രം അല്ഭുതകരമായി രക്ഷപ്പെട്ടത് തെല്ല് ആശ്വാസകരമാണെന്നും റിയാദ് ഒഐസിസി പ്രസ്താവനയില് പറഞ്ഞു.
അധികം കാലപ്പഴക്കം പോലും ഇല്ലാത്ത ബോയിങ്ങിന്റെ ഡ്രീം ലൈനര് 787 - 8 അത്യാധുനിക യാത്രാ വിമാനമായിട്ട് പോലും ഇത്തരം അപകടം സംഭവിച്ചുവെങ്കില്, ഇന്ത്യയില് നിന്നും ഗള്ഫ് സെക്ട്ടറുകളിലേക്ക് സര്വ്വീസ് നടത്തുന്ന ഒട്ടുമിക്ക വിമാന കമ്പനികളും വളരെ കാലപ്പഴക്കം ചെന്നതും, യഥാവിധി അറ്റകുറ്റ പണികള് പോലും നടത്താത്തതുമാണ് എന്നത് പ്രവാസ ലോകത്ത് ആളുകളില് ഭീതിയുളവാക്കുന്നു. അതുകൊണ്ട് ഇത്തരം കാലപ്പഴക്കം ചെന്ന വിമാനങ്ങളുടെ സര്വ്വീസുകള് നിര്ത്തിവെക്കുകയും പകരം യാത്രക്കാരുടെ സുരക്ഷ ഉറപ്പ് വരുത്തുന്നതിനായി വിമാന കമ്പനികള്ക്ക് കര്ശന നിര്ദ്ദേശങ്ങള് ഗവണ്മെന്റുകളുടെ ഭാഗത്ത് നിന്ന് നല്കണമെന്ന് ഒഐസിസി റിയാദ് സെന്ട്രല് കമ്മിറ്റി ആവശ്യപ്പെട്ടു.
Related News
