കൊച്ചി: കെനിയയില് ബസ് അപകടത്തില് മരിച്ച അഞ്ച് മലയാളികളുടെ മൃതദേഹം ഖത്തര് എയര്വേയ്സ് വിമാനത്തില് നെടുമ്പാശേരി വിമാനത്താവളത്തില് എത്തിച്ചു. മന്ത്രി പി.രാജീവ് നെടുമ്പാശ്ശേരിയില് മൃതദേഹങ്ങള് ഏറ്റുവാങ്ങി മൂവാറ്റുപുഴ സ്വദേശിനി ജസ്ന (29), മകള് റൂഹി മെഹ്റിന് (ഒന്നര വയസ്), മാവേലിക്കര ചെറുകോല് സ്വദേശിനി ഗീത ഷോജി ഐസക് (58), പാലക്കാട് മണ്ണൂര് സ്വദേശിനി റിയ ആന് (41), മകള് ടൈറ റോഡ്രിഗസ് (7) എന്നിവരുടെ മൃതദേഹങ്ങളാണ് എത്തിച്ചത്.
കെനിയയില്നിന്ന് കൊണ്ടുവരുന്ന മൃതദേഹങ്ങള്ക്കും ഒപ്പമുള്ള ബന്ധുക്കള്ക്കും ഇന്ത്യയിലേക്ക് പ്രവേശിക്കുന്നതിന് യെല്ലോ ഫിവര് വാക്സിന് സര്ട്ടിഫിക്കറ്റ് വേണമെന്ന നിബന്ധനയില്, മുഖ്യമന്ത്രി പിണറായി വിജയന്റെ അതിവേഗ ഇടപെടലിനെതുടര്ന്ന് കേന്ദ്രസര്ക്കാര് പ്രത്യേക ഇളവ് അനുവദിച്ചുരുന്നു. കെനിയയില്നിന്ന് ഖത്തറിലേക്ക് വിമാനം പുറപ്പെടുന്നതിന് ഏതാനും മണിക്കൂര്മുമ്പാണ് യെല്ലോ ഫിവര് വാക്സിന് സര്ട്ടിഫിക്കറ്റ് അനിവാര്യമാണെന്ന് ട്രാവല് ഏജന്സി അധികൃതര് വ്യക്തമാക്കിയത്. ഇതോടെ മൃതദേഹങ്ങള് നാട്ടിലെത്തിക്കുന്നത് വൈകുമെന്ന ആശങ്ക ഉയര്ന്നിരുന്നു.
പാലക്കാട് മണ്ണൂര് സ്വദേശിനി റിയയുടെ ഭര്ത്താവ് ജോയലും മകനും വിമാനത്തില് നെടുമ്പാശ്ശേരിയില് എത്തിയിട്ടുണ്ട്. തോളിന് പരിക്കേറ്റ ജോയലിന് ശസ്ത്രക്രിയ നടത്തേണ്ടതിനാല് പ്രത്യേക ആംബുലന്സില് പാലക്കാട്ടേക്ക് കൊണ്ടു പോയി. മണ്ണൂരിലെ പൊതുദര്ശനത്തിന് ശേഷം റിയയുടെ മൃതദേഹം കോയമ്പത്തൂരിലേക്ക് കൊണ്ടുപോകും. അവിടെയാണ് സംസ്കാര ചടങ്ങുകള് നടക്കുക.
മൂവാറ്റുപുഴ സ്വദേശിനി ജസ്നയുടെ ഭര്ത്താവ് ഹനീഫും എത്തിയിട്ടുണ്ട്. മാവേലിക്കര ചെറുകോല് സ്വദേശിനി ഗീത ഷോജി ഐസകിന്റെ സംസ്കാരം കൊച്ചി മാര്ത്തോമ പള്ളിയില് ചൊവ്വാഴ്ച നടക്കും.
Related News
