ജിദ്ദ: ഇറാനില് ഇസ്രായേല് നടത്തിയ ഏകപക്ഷീയമായ ആക്രമണങ്ങളും അതിന് ഇറാന് നടത്തിയ പ്രത്യാക്രമണങ്ങളും മിഡില് ഈസ്റ്റില് ഉണ്ടാക്കിയിരിക്കുന്ന യുദ്ധസമാനമായ അന്തരീക്ഷത്തിന്റെ പശ്ചാത്തലത്തില് ഹജ്ജ് തീര്ത്ഥാടനം കഴിഞ്ഞു മടങ്ങുന്ന ഇറാനിയന് തീര്ത്ഥാടകരുടെ കാര്യത്തില് പ്രത്യേക സുരക്ഷാ - ക്ഷേമ നടപടികള് കൈകൊള്ളുകയാണ് സൗദി അറേബ്യ.
ഇറാനിയന് തീര്ഥാടകരുടെ എല്ലാ ആവശ്യങ്ങളും നിറവേറ്റുന്നതിനും അവരുടെ മാതൃരാജ്യത്തിലേക്കും കുടുംബങ്ങളിലേക്കുമുള്ള സുരക്ഷിതമായ മടങ്ങുന്നതിനുള്ള സാഹചര്യങ്ങള് ശരിയാകുന്നതുവരെ അവര്ക്ക് എല്ലാ സേവനങ്ങളും നല്കുന്നതിന് പ്രത്യേക നിര്ദേശങ്ങള് പുറപ്പെടുവിച്ചിരിക്കുകയാണ് സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിന് സല്മാന് രാജകുമാരന്.
നിലവില് മക്കയിലും മദീനയിലുമായി ഏതാണ്ട് മുക്കാല് ലക്ഷത്തിലേറെ ഇറാനിയന് തീര്ത്ഥാടകരാണ് ഉള്ളത്. ഇവരുടെ കാര്യങ്ങള് നിരീക്ഷിക്കുന്നതിനും ആവശ്യങ്ങള് നിറവേറ്റുന്നതിനുമായി സൗദി അറേബ്യ ഹജ്ജ്, ഉംറ മന്ത്രാലയത്തിനുള്ളില് ഒരു പ്രത്യേക ഓപ്പറേഷന് റൂം സ്ഥാപിച്ചു സൗദി അറേബ്യയില് കഴിയുന്ന വേളയിലും, സ്വദേശത്തേക്ക് പുറപ്പെടുന്നതുവരെയും ഉയര്ന്ന നിലവാരമുള്ള സേവനങ്ങളും പരിചരണവും അവര്ക്ക് ലഭിക്കുന്നുവെന്ന് ഉറപ്പാക്കുന്നതിന് ഭാഗമായാണ് ഇത്.
ഇറാനില് ഇസ്രായേലിന്റെ ആക്രമണം വര്ദ്ധിച്ചതിനെ തുടര്ന്നാണ് സൗദിയുടെ ഭാഗത്തു നിന്നുള്ള പ്രത്യേക നടപടികള്. ഇറാന് ഹാജിമാരുടെ മടക്കത്തിന് പ്രത്യേക പദ്ധ്വതി തന്നെ കൊണ്ടുവന്നിരിക്കുകയാണ് സൗദി അറേബ്യ. ഇത് പ്രകാരം ഇറാനിയന് ഹാജിമാരെ ജിദ്ദയിലെ കിംഗ് അബ്ദുല് അസീസ് വിമാനത്താവളം, മദീനയിലെ പ്രിന്സ് മുഹമ്മദ് ബിന് അബ്ദുല് അസീസ് വിമാനത്താവളം എന്നിവിടങ്ങളില് നിന്നുള്ള ആഭ്യന്തര വിമാന സര്വീസുകളിലൂടെ അറാഅര് അതിര്ത്തി ചെക്ക്പോസ്റ്റില് എത്തിക്കുകയും അവിടെ നിന്ന് അവര് കരമാര്ഗം ഇറാനിലേക്ക് യാത്ര ചെയ്യുകയും ചെയ്യും. ഇത് സംബന്ധിച്ച പദ്ധതി വെള്ളിയാഴ്ച മുതല് പ്രാബല്യത്തിലാക്കി തുടങ്ങി.
Related News
