മദീന- മസ്തിഷ്ക രക്തസ്രാവം ബാധിച്ച ഇറാഖി വനിതാ തീര്ഥാടകയുടെ ജീവന് രക്ഷിക്കാന് സൗദി അറേബ്യയുടെ അടിയന്തര ചികിത്സാ സംവിധാനത്തിന് സാധിച്ചു. മദീനയിലെ കിംഗ് സല്മാന് ബിന് അബ്ദുല് അസീസ് മെഡിക്കല് സിറ്റിയിലെ മെഡിക്കല് ടീമുകളാണ് അതിവേഗ ഇടപെടലിലൂടെ തീര്ത്ഥാടകയുടെ ജീവന് രക്ഷിച്ചതെന്ന് സൗദി പ്രസ് ഏജന്സി റിപ്പോര്ട്ട് ചെയ്തു.
ക്ലിനിക്കല് പരിശോധനയിലും ഇന്റര്വെന്ഷണല് റേഡിയോളജിയിലും ഒരു ധമനി പൊട്ടിയതായി കണ്ടെത്തി. ഇതിന് അടിയന്തര ചികിത്സ ആവശ്യമായിരുന്നുവെന്ന് മദീന ഹെല്ത്ത് ക്ലസ്റ്റര് അറിയിച്ചു.
രോഗിയുടെ നില ഭദ്രമാക്കിയ ശേഷം കോയിലിംഗ് സാങ്കേതികവിദ്യ ഉപയോഗിച്ച് കൃത്യമായ ഒരു ശസ്ത്രക്രിയ നടത്തി. ഇന്റര്വെന്ഷണല് ന്യൂറോ റേഡിയോളജി ടീം രക്തസ്രാവം തടയുകയും കൂടുതല് സങ്കീര്ണതകള് ഒഴിവാക്കുകയും ചെയ്തു.
തീര്ത്ഥാടകക്ക് പൂര്ണ്ണ ബോധം വീണ്ടെടുക്കാനും ന്യൂറോളജിക്കല് പ്രശ്നങ്ങളില്ലാതെ സാധാരണ നിലയിലേക്ക് മടങ്ങാനും കഴിഞ്ഞതായി മദീന ഹെല്ത്ത് ക്ലസ്റ്റര് അറിയിച്ചു. നാട്ടിലേക്ക് മടങ്ങുന്നതിന് മുന്പ് ഇവര്ക്ക് പുനരധിവാസ ചികിത്സ നല്കി വരികയാണ്.
മദീന ഹെല്ത്ത് ക്ലസ്റ്ററിന്റെ ഭാഗമായ കിംഗ് സല്മാന് മെഡിക്കല് സിറ്റിയുടെ കഴിവുകളും തീര്ത്ഥാടകര്ക്ക് പ്രത്യേക പരിചരണം നല്കാനുള്ള സന്നദ്ധതയും പ്രശംസനായമാണെന്ന് സൗദി പ്രസ് ഏജന്സി റിപ്പോര്ട്ട് ചെയ്തു.
Related News
