റിയാദ്- മദീന പ്രവിശ്യയിലെ യാമ്പു നഗരത്തില് നടന്ന 'ബഹാര്' ഫെസ്റ്റിവല് കലാപരമായ പ്രകടനങ്ങള്, സാംസ്കാരിക, ടൂറിസം, പൈതൃക പ്രവര്ത്തനങ്ങള് എന്നിവയിലൂടെ താമസക്കാരെയും സന്ദര്ശകരെയും ആകര്ഷിച്ചതായി സൗദി പ്രസ് ഏജന്സി റിപ്പോര്ട്ട് ചെയ്തു.
ഒരാഴ്ച നീണ്ടുനിന്ന ഫെസ്റ്റിവലില് ചെങ്കടലിലെ തങ്ങളുടെ അനുഭവങ്ങള് യാമ്പുവിലെ പ്രമുഖ മത്സ്യത്തൊഴിലാളികള് പങ്കുവെച്ചത് ശ്രദ്ധേയമായി.
ബഹാര് ഫെസ്റ്റിവല് ടെന്റില് ഒരു തിയേറ്റര്, കുട്ടികളുടെ കലാമുറി, ഫോക്ലോര് ബാന്ഡിന്റെ പ്രകടനങ്ങള്, സമുദ്രവുമായി ബന്ധപ്പെട്ട കരകൗശല വസ്തുക്കള്ക്കും ലളിതകലാപ്രദര്ശനങ്ങള്ക്കുമുള്ള പവലിയന്, ചെങ്കടല് തീരത്തെ ജൈവവൈവിധ്യത്തെക്കുറിച്ചുള്ള പ്രദര്ശനം എന്നിവ ഉള്പ്പെട്ടിരുന്നു.
മറൈന് മത്സ്യബന്ധന നിയന്ത്രണങ്ങള്, ആധുനിക മത്സ്യകൃഷി സമ്പ്രദായങ്ങള്, കടലിനെയും തീരദേശ പരിസ്ഥിതിയെയും സംരക്ഷിക്കുന്നതിനുള്ള സംരംഭങ്ങള് എന്നിവയെക്കുറിച്ചുള്ള ചര്ച്ചകളും ശില്പശാലകളും അനുബന്ധ പരിപാടികളായി നടന്നു.
മത്സ്യത്തൊഴിലാളികള്ക്കുള്ള ധനസഹായ അവസരങ്ങളെക്കുറിച്ചുള്ള വിദഗ്ധരുടെ അവതരണങ്ങളും പരിപാടിയില് ഉള്പ്പെടുത്തിയിരുന്നു. സുസ്ഥിര മത്സ്യബന്ധനത്തിന്റെ വികസനത്തെ പിന്തുണക്കുക എന്നതായിരുന്നു മേളയുടെ ലക്ഷ്യം.
