അബുദാബി: അഹമ്മദാബാദ് എയര് ഇന്ത്യ വിമാന ദുരന്തത്തില് മരിച്ച ബിജെ മെഡിക്കല് കോളജിലെ വിദ്യാര്ഥികള്ക്കും ഡോക്ടര്മാരുടെയും കുടുംബാംഗങ്ങള്ക്കും ആശ്വാസമായി പ്രമുഖ ഡോക്ടറും ആരോഗ്യ സംരംഭകനുമായ ഷംഷീര് വയലില് ആറുകോടി രൂപയുടെ (25 ലക്ഷം ദിര്ഹം) സാമ്പത്തിക സഹായം പ്രഖ്യാപിച്ചു. വിമാനം ഹോസ്റ്റലിലേക്ക് ഇടിച്ചുകയറി ജീവന് നഷ്ടപ്പെട്ട എംബിബിഎസ് വിദ്യാര്ഥികളായ രാജസ്ഥാനിലെ ജയപ്രകാശ് ചൗധരി, മാനവ് ഭാദു, മധ്യപ്രദേശിലെ ആര്യന് രജ്പുത്, ഗുജറാത്തിലെ രാകേഷ് ദിഹോറ എന്നിവരുടെ കുടുംബങ്ങള്ക്ക് ഒരു കോടി രൂപ വീതം നല്കും. ഗുരുതരമായി പരുക്കേറ്റ അഞ്ച് വിദ്യാര്ഥികള്ക്കും അപകടത്തില് കുടുംബാംഗങ്ങളെ നഷ്ടപ്പെട്ട മെഡിക്കല് കോളജിലെ ഡോക്ടര്മാര്ക്കും 20 ലക്ഷം രൂപ വീതവും ഡോ. ഷംഷീര് നല്കും.
മെഡിക്കല് പഠനകാലത്തെ ഹോസ്റ്റല് അന്തരീക്ഷവും കൂട്ടായ്മകളും ഓര്ക്കുമ്പോള് ഈ ദുരന്തം വ്യക്തിപരമായി ഏറെ വേദനാജനകമാണെന്ന് ഡോ. ഷംഷീര് പറഞ്ഞു. മംഗലാപുരത്തെ കസ്തൂര്ബ മെഡിക്കല് കോളജിലും ചെന്നൈയിലെ ശ്രീരാമചന്ദ്ര മെഡിക്കല് കോളജിലുമുള്ള സ്വന്തം വിദ്യാര്ഥി ജീവിതകാലത്തെ ഹോസ്റ്റല് ഓര്മകള് അപകട ദൃശ്യങ്ങള് കണ്ടപ്പോള് മനസ്സിലേക്ക് ഓടിയെത്തി. വിദ്യാര്ഥികളുടെയും അവരുടെ ചുറ്റുപാടുകളുടെയും അവസ്ഥ തനിക്ക് സുപരിചിതമാണ്. ആരോഗ്യ സേവനം സ്വപ്നം കണ്ട് ലക്ഷ്യത്തിലേക്ക് അടുക്കുമ്പോഴാണ് ഈ ദാരുണ സംഭവം. ദുരന്തത്തില്പ്പെട്ട വിദ്യാര്ഥികളുടെ ആഗ്രഹങ്ങള് നിറവേറ്റാനും അവരുടെ കുടുംബാംഗങ്ങള്ക്ക് താങ്ങും തണലുമാകാനുമാണ് ഈ സഹായമെന്ന് അദ്ദേഹം വ്യക്തമാക്കി.
ദുരന്തബാധിതരായ വിദ്യാര്ഥികളെയും കുടുംബങ്ങളെയും സഹായിക്കുന്നതിനായി പ്രവര്ത്തിക്കുന്ന ബിജെ മെഡിക്കല് കോളജിലെ ജൂനിയര് ഡോക്ടര്മാരുടെ അസോസിയേഷനുമായി സഹകരിച്ച് സഹായം ആവശ്യമുള്ളവരുടെ വിവരങ്ങള് ശേഖരിക്കുകയാണെന്ന് ഡോ. ഷംഷീര് വെളിപ്പെടുത്തി.
2010ലെ മംഗലാപുരം വിമാന ദുരന്തത്തില് ജീവന് നഷ്ടമായവരുടെ കുടുംബാംഗങ്ങള്ക്ക് ഡോ. ഷംഷീര് സാമ്പത്തിക, വിദ്യാഭ്യാസ സഹായവും യു.എ.ഇയില് ജോലിയും നല്കിയിരുന്നു. നിപ, കോവിഡ്, പ്രളയം തുടങ്ങിയ പ്രതിസന്ധി ഘട്ടങ്ങളിലും അദ്ദേഹത്തിന്റെ സഹായം നിര്ണായകമായിട്ടുണ്ട്.
Related News
