ദുബായ്: ലോകത്തെ ഏറ്റവും സുരക്ഷിത വിമാനക്കമ്പനികളുടെ പട്ടികയില്‍ യു.എ.ഇയിലെ കമ്പനികള്‍ മുന്നില്‍. എയര്‍ലൈന്‍ റേറ്റിങ് ഡോട്ട്‌കോം പുറത്തുവിട്ട ഏറ്റവും പുതിയ പട്ടികയില്‍ ദുബായ് ആസ്ഥാനമായ എമിറേറ്റ്‌സ് മൂന്നാം സ്ഥാനത്തും അബൂദബി ആസ്ഥാനമായ ഇത്തിഹാദ് അഞ്ചാം സ്ഥാനത്തുമെത്തി. എയര്‍ ന്യൂസിലന്‍ഡ് ആണ് പട്ടികയില്‍ ഒന്നാം സ്ഥാനത്തുള്ളത്.

എച്ച്.കെ എക്‌സ്പ്രസ് എന്ന കമ്പനിയാണ് ലോ കോസ്റ്റ് വിമാനക്കമ്പനികളില്‍ ആദ്യസ്ഥാനം നേടിയത്. പട്ടികയില്‍ ഖത്തര്‍ എയര്‍വേസിനൊപ്പമാണ് എമിറേറ്റ്‌സ് മൂന്നാം സ്ഥാനത്തുള്ളത്. ഫ്‌ലൈ ദുബായും ഷാര്‍ജ ആസ്ഥാനമായ എയര്‍ അറേബ്യയും ലോ കോസ്റ്റ് വിമാനക്കമ്പനികളില്‍ ഏറ്റവും സുരക്ഷിതമായവയുടെ പട്ടികയില്‍ ഇടം നേടിയിട്ടുണ്ട്.

പട്ടികയില്‍ ഫ്‌ലൈ ദുബായ് 11-ാം സ്ഥാനത്തും എയര്‍ അറേബ്യ 18-ാം സ്ഥാനത്തുമാണുള്ളത്. പൈലറ്റുമാരുമായും വ്യോമയാന വിദഗ്ധരുമായും കൂടിയാലോചനകള്‍ നടത്തുന്നതിനു പുറമെ, കഴിഞ്ഞ രണ്ട് വര്‍ഷത്തിനിടയിലെ ഗുരുതരമായ സംഭവങ്ങള്‍, വിമാനങ്ങളുടെ പ്രായം, വലിപ്പം, സംഭവങ്ങളുടെ നിരക്ക്, മരണനിരക്ക്, ലാഭക്ഷമത, ഐ. ഒ.എസ്.എ സര്‍ട്ടിഫിക്കേഷന്‍, ഐ.സി.എ.ഒ കണ്‍ട്രി ഓഡിറ്റ് പാസ്, പൈലറ്റ് വൈദഗ്ധ്യവും പരിശീലനവും എന്നിവയാണ് റാങ്കിങ് നിര്‍ണയിക്കുന്നതില്‍ പ്രധാന പങ്ക് വഹിക്കുന്നത്.

2018 നും 2022നും ഇടയില്‍ ആഗോളതലത്തില്‍ വിമാനയാത്രയില്‍ മരണസാധ്യത ഏകദേശം 1.37 കോടി പേരില്‍ ഒരാള്‍ക്ക് മാത്രമാണെന്ന് അടുത്തിടെ നടത്തിയ ഒരു എയര്‍ലൈന്‍ സുരക്ഷ പഠനത്തില്‍ വെളിപ്പെടുത്തിയിരുന്നു. അതേസമയം 2024 ഡിസംബറില്‍ മാത്രം 200ലധികം ജീവന്‍ നഷ്ടപ്പെടുന്ന സാഹചര്യമുണ്ടായി.