കണ്ണൂര്: പിണറായി കായലോട് പറമ്പായിയില് റസീന മന്സിലില് റസീന (40) കഴിഞ്ഞ ദിവസം ആത്മഹത്യ ചെയ്ത കേസുമായി ബന്ധപ്പെട്ട് മൂന്നു പേര് അറസ്റ്റില്. പറമ്പായി സ്വദേശികളായ എം.സി. മന്സിലില് വി.സി. മുബഷീര് (28), കണിയാന്റെ വളപ്പില് കെ.എ. ഫൈസല് (34), കൂടത്താന്കണ്ടി ഹൗസില് വി.കെ. റഫ്നാസ് (24) എന്നിവരെയാണ് അറസ്റ്റ് ചെയ്തത്. ആത്മഹത്യക്കുറിപ്പില്നിന്ന് കിട്ടിയ സൂചനയുടെ അടിസ്ഥാനത്തിലാണ് അറസ്റ്റ്. ധര്മടം ഒഴയില് ഭാഗം എം.കെ റഫീഖിന്റെ ഭാര്യയാണ് റസീന.
ഞായറാഴ്ച വൈകീട്ട് കായലോട് അച്ചങ്കര പള്ളിക്കു സമീപം കാറിനരികില് റസീന സുഹൃത്തിനോട് സംസാരിച്ചു നില്ക്കുന്നത് അറസ്റ്റിലായവര് ഉള്പ്പെടെയുള്ള സംഘം ചോദ്യം ചെയ്തു. യുവതിയെ വീട്ടിലേക്ക് പറഞ്ഞയച്ചശേഷം മയ്യില് സ്വദേശിയായ സുഹൃത്തിനെ കൈയ്യേറ്റം ചെയ്യുകയും സമീപത്തുള്ള മൈതാനത്തേക്ക് കൊണ്ടു പോയി വിചാരണ ചെയ്യുകയും ചെയ്തുവെന്നു പറയുന്നു. അഞ്ച് മണിക്കൂറോളം യുവാവിനെ തടഞ്ഞുവച്ച് വിചാരണ ചെയ്ത സംഘം മൊബൈല് ഫോണും ടാബും പിടിച്ചെടുത്ത് വിട്ടയക്കുകയായിരുന്നു. പിന്നീട് റസീനയുടേയും യുവാവിന്റെയും ബന്ധുക്കളെ വിളിച്ചുവരുത്തി വിവരങ്ങള് പറയുകയും രാത്രി വൈകി യുവാവിനെ ബന്ധുക്കള്ക്കൊപ്പം വിട്ടയയ്ക്കുകയായിരുന്നു.
യുവാവിന്റെ കൈയില്നിന്ന് പിടിച്ചെടുത്ത ടാബും മൊബൈല്ഫോണും അറസ്റ്റിലായ പ്രതികളില്നിന്ന് പൊലീസ് കണ്ടെത്തി. കൂടുതല് പ്രതികളുണ്ടെന്നും അന്വേഷണം നടക്കുകയാണെന്നും പൊലീസ് അറിയിച്ചു. തലശ്ശേരി ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് ഹാജരാക്കിയ ഇവരെ റിമാന്ഡ് ചെയ്തു. അറസ്റ്റിലായവര് എസ്ഡിപിഐ പ്രവര്ത്തകരാണെന്ന് പൊലീസ് അറിയിച്ചു.
Related News
