ദുബായ്: പിണങ്ങിയ ഭാര്യയുടെ സ്‌നേഹം തിരികെ ലഭിക്കാന്‍ ദുര്‍മന്ത്രവാദിനിയുടെ സഹായം തേടിയ യുവാവിന് ആറു മാസത്തെ ജയില്‍ശിക്ഷ വിധിച്ച് ഫുജൈറ അപ്പീല്‍ കോടതി. ദുര്‍മന്ത്രവാദിനിക്ക് ഭര്‍ത്താവ് നല്‍കിയത് 30,000 ദിര്‍ഹം. ഭാര്യയുടെയും കുടുംബത്തിന്റെയും സ്വകാര്യ ഫോട്ടോകള്‍ മന്ത്രവാദിനിക്ക് വാട്സ്ആപ് വഴി അയച്ചു നല്‍കുകയും ചെയ്തു. ഭര്‍ത്താവ് തന്റെയും മക്കളുടെയും കുടുംബത്തിന്റെയും മേല്‍ ദുര്‍മന്ത്രവാദം നടത്തുന്നതായി അവകാശപ്പെട്ട് യുവതി പൊലീസില്‍ പരാതിപ്പെട്ടതോടെയാണ് കേസിന് തുടക്കം. തുടര്‍ന്ന് അറസ്റ്റിലായ യുവാവ് കുറ്റം സമ്മതിച്ചതായി പ്രാദേശിക പത്രം റിപ്പോര്‍ട്ട് ചെയ്തു.

മന്ത്രവാദിനിയുമായി ഓണ്‍ലൈനില്‍ ബന്ധപ്പെട്ട യുവാവ് ഇവര്‍ക്ക് 20,000 ദിര്‍ഹമും ഭാര്യയുടെ സ്വകാര്യ ഫോട്ടോകളും തന്റെ സ്വകാര്യ വിഡിയോയും ഇരുവരുടെയും ഫോണ്‍ നമ്പറുകളും അയച്ചു നല്‍കുകയായിരുന്നു. പിന്നീട് ദുര്‍മന്ത്രവാദിനി 25,000 ദിര്‍ഹം കൂടി ആവശ്യപ്പെട്ടെങ്കിലും ഇയാള്‍ നിരസിച്ചു. അതോടെ മന്ത്രവാദിനി ഇയാളുടെ വാട്സ്ആപ് സംഭാഷണങ്ങളും ഫോട്ടോകളും ഭാര്യക്ക് അയച്ചു നല്‍കുകയായിരുന്നു. സംഭവം അറിഞ്ഞതോടെ ഭാര്യ വിവാഹമോചനത്തിന് കേസ് നല്‍കുകയും വീട്ടില്‍നിന്ന് വിട്ടുനില്‍ക്കുകയും ചെയ്തു. എന്നാല്‍, ഇത് അവഗണിച്ച ഇയാള്‍ മറ്റൊരു മന്ത്രവാദിനിയുമായി ബന്ധപ്പെടുകയും ഇവര്‍ക്ക് 10,000 ദിര്‍ഹം നല്‍കുകയും ചെയ്തു. അതും പരാജയപ്പെട്ടതോടെ മൂന്നാമതൊരു യുവതിയുമായും ബന്ധപ്പെട്ടു. ഇവര്‍ പക്ഷേ, പണം ആവശ്യപ്പെടുന്നതിന് മുമ്പ് ഇയാളെ പൊലീസ് അറസ്റ്റു ചെയ്യുകയായിരുന്നു. ഭാര്യയുടെ സ്വകാര്യതയെ ഹനിക്കുന്ന രീതിയില്‍ പ്രവര്‍ത്തിച്ചുവെന്നതാണ് ഭര്‍ത്താവിനെതിരായ ഒരു കുറ്റം. ഒപ്പം ദുര്‍മന്ത്രവാദത്തിന് ഒത്താശചെയ്തുവെന്നും കോടതി കണ്ടെത്തി. ഇതോടെ കീഴ്‌കോടതി ആറു മാസത്തെ തടവ് ശിക്ഷയും കണ്ടെത്തിയ ഫോട്ടോകളും മറ്റും നശിപ്പിക്കാന്‍ ഉത്തരവിടുകയും ചെയ്തു. ഇതിനെതിരെ പ്രതി നല്‍കിയ അപ്പീലാണ് മേല്‍ കോടതി തള്ളിയത്.