ന്യൂഡല്‍ഹി: ചെന്നൈയില്‍നിന്ന് മധുരയിലേക്ക് പോവുകയായിരുന്ന ഇന്‍ഡിഗോ വിമാനം പറക്കലിനിടെ സാങ്കേതിക തകരാറ് ഉണ്ടായതിനെതുടര്‍ന്ന് ചെന്നൈയില്‍ തിരിച്ചിറക്കിയതായി വിമാനത്താവള അധികൃതര്‍ അറിയിച്ചു. അരമണിക്കൂറോളം പറന്ന ശേഷം ഇന്‍ഡിഗോ എയര്‍ലൈന്‍സ് വിമാനത്തിന്റെ പൈലറ്റ് തകരാര്‍ കണ്ടെത്തിയെന്നും ചെന്നൈയിലേക്ക് തിരികെ പറന്ന് ലാന്‍ഡ് ചെയ്യാന്‍ അനുമതി തേടിയെന്നും വിമാനത്താവള അധികൃതര്‍ പറഞ്ഞു. 60 യാത്രക്കാരുമായി പറന്ന വിമാനം പിന്നീട് സുരക്ഷിതമായി ഇറക്കി യാത്രക്കാരെയെല്ലാം പുറത്തിറക്കി.

അന്താരാഷ്ട്ര, ആഭ്യന്തര റൂട്ടുകള്‍ ഉള്‍പ്പെടെ ഏഴു വിമാനങ്ങള്‍ റദ്ദാക്കിയതായി എയര്‍ ഇന്ത്യ അറിയിച്ചു. അറ്റകുറ്റപ്പണികളുടെയും പ്രവര്‍ത്തനപരവുമായ കാരണങ്ങളാല്‍ ആണിതെന്നാണ് വിശദീകരണം. അഹമ്മദാബാദില്‍നിന്ന് ലണ്ടനിലേക്കുള്ള എയര്‍ ഇന്ത്യ വിമാനം തകര്‍ന്നതിനു ദിവസങ്ങള്‍ക്ക് ശേഷമാണ് റദ്ദാക്കലുകള്‍. ദുബായി, ചെന്നൈ, ഡല്‍ഹി, മെല്‍ബണ്‍, പുണെ, അഹമ്മദാബാദ്, ഹൈദരാബാദ്, മുംബൈ എന്നിവക്കിടയിലുള്ള സര്‍വിസുകളും ഇതില്‍ ഉള്‍പ്പെടുന്നു.

യാത്രക്കാര്‍ക്ക് എത്രയും വേഗം അവരുടെ ലക്ഷ്യസ്ഥാനങ്ങളിലേക്ക് പറക്കുന്നതിനുള്ള ബദല്‍ ക്രമീകരണങ്ങള്‍ ചെയ്യുന്നതായി എയര്‍ ഇന്ത്യ അറിയിച്ചു. റദ്ദാക്കലിനോ സൗജന്യമായി ഷെഡ്യൂള്‍ ചെയ്യുന്നതിനോ യാത്രക്കാര്‍ക്ക് പൂര്‍ണമായ റീഫണ്ട് വാഗ്ദാനം ചെയ്തിട്ടുണ്ടെന്നും എയര്‍ലൈന്‍ അറിയിച്ചു.
ദുബായില്‍നിന്ന് ചെന്നൈയിലേക്കുള്ള AI906, ഡല്‍ഹിയില്‍ നിന്ന് മെല്‍ബണിലേക്കുള്ള AI308, മെല്‍ബണില്‍ നിന്ന് ഡല്‍ഹിയിലേക്കുള്ള AI309, ദുബായില്‍ നിന്ന് ഹൈദരാബാദിലേക്കുള്ള AI2204 എന്നീ അന്താരാഷ്ട്ര വിമാനങ്ങളാണ് റദ്ദാക്കിയത്. പൂനെയില്‍ നിന്ന് ഡല്‍ഹിയിലേക്കുള്ള AI874, അഹമ്മദാബാദില്‍ നിന്ന് ഡല്‍ഹിയിലേക്കുള്ള AI456, ഹൈദരാബാദില്‍ നിന്ന് മുംബൈയിലേക്കുള്ള AI2872, ചെന്നൈയില്‍ നിന്ന് മുംബൈയിലേക്കുള്ള Aക571 എന്നീ നാല് ആഭ്യന്തര വിമാനങ്ങള്‍ റദ്ദാക്കിയെന്നും എയര്‍ ഇന്ത്യ അറിയിച്ചു.