ടെല് അവീവ്: ഇറാനിലെ ആണവ കേന്ദ്രങ്ങളില് അമേരിക്ക ആക്രമണം നടത്തിയതിന് പിന്നാലെ ഇസ്രായേല് അതീവ ജാഗ്രതയിലായി. രാജ്യത്തിന്റെ വ്യോമാതിര്ത്തി അടച്ചതായും അകത്തോട്ടും പുറത്തോട്ടുമുള്ള വിമാനങ്ങളെല്ലാം റദ്ദാക്കിയതായും ഇസ്രായേല് എയര്പോര്ട്ട് അതോറിറ്റി അറിയിച്ചു.
ഞായറാഴ്ച പുലര്ച്ചെയാണ് അമേരിക്ക ഇറാനിലെ ഫോര്ദോ, നതാന്സ്, ഇസ്ഫഹാന് എന്നീ മൂന്ന് ആണവ നിലയങ്ങളില് ആക്രമണം നടത്തിയത്. ഈ ആക്രമണത്തിന് പിന്നാലെ ഇറാന് ഇസ്രായേലിന് നേരെ തിരിച്ചടി ആക്രമണങ്ങള് ആരംഭിച്ചതായും റിപ്പോര്ട്ടുകളുണ്ട്. ഇസ്രായേലിലെ ടെല് അവീവ്, ജറുസലേം, ഹൈഫ അടക്കമുള്ള 10 സുപ്രധാന മേഖലകളില് ഇറാന് മിസൈലുകള് പതിച്ചതായി പ്രാദേശിക മാധ്യമങ്ങള് റിപ്പോര്ട്ട് ചെയ്തു. മിസൈല് ആക്രമണങ്ങളില് 23 പേര്ക്ക് പരിക്കേറ്റതായും കെട്ടിടങ്ങള്ക്ക് കേടുപാടുകള് സംഭവിച്ചതായും ഇസ്രായേല് രക്ഷാപ്രവര്ത്തകര് അറിയിച്ചു.
ഇസ്രായേലിലെ സുപ്രധാന വിമാനത്താവളമായ ബെന് ഗുറിയോണും ആക്രമിച്ചതായി ഇറാന് അവകാശപ്പെടുന്നുണ്ടെങ്കിലും ഇക്കാര്യത്തില് ഔദ്യോഗിക സ്ഥിരീകരണമില്ല. ഇറാനിലെ ആണവ കേന്ദ്രങ്ങള് പൂര്ണ്ണമായും നശിപ്പിച്ചുവെന്നും ഇത് ചരിത്ര നിമിഷമാണെന്നും യുഎസ് പ്രസിഡന്റ് ഡൊണാള്ഡ് ട്രംപ് പ്രസ്താവിച്ചു. യുദ്ധം അവസാനിപ്പിക്കാന് ഇറാന് തയ്യാറാകണമെന്നും ട്രംപ് ആവശ്യപ്പെട്ടു.
ഇറാന്-ഇസ്രായേല് സംഘര്ഷം തുടങ്ങി പത്താം ദിവസമാണ് അമേരിക്കയുടെ നേരിട്ടുള്ള ഈ ഇടപെടല്. ആണവ നിലയങ്ങള് തകര്ക്കാന് ശേഷിയുള്ള ജിബിയു-57 ബങ്കര് ബസ്റ്റര് ബോംബുകളുമായി ബി-2 സ്റ്റെല്ത്ത് ബോംബര് വിമാനങ്ങളാണ് ആക്രമണം നടത്തിയത്. ഗുവാം ദ്വീപില് നിന്നാണ് അമേരിക്കന് വിമാനങ്ങള് പുറപ്പെട്ടത്.
യുഎസ് ആക്രമണത്തെ ഇറാന് ശക്തമായി അപലപിച്ചു. അമേരിക്കയുടെ നടപടി അന്താരാഷ്ട്ര നിയമങ്ങളുടെ ലംഘനമാണെന്നും തങ്ങളുടെ പരമാധികാരം സംരക്ഷിക്കാന് എല്ലാ നടപടികളും സ്വീകരിക്കുമെന്നും ഇറാന് മുന്നറിയിപ്പ് നല്കി. മേഖലയിലെ സംഘര്ഷം കൂടുതല് വഷളാകുമെന്ന ആശങ്കയും ഉയര്ന്നിട്ടുണ്ട്. ന്യൂയോര്ക്കിലും വാഷിംഗ്ടണിലും മത സ്ഥാപനങ്ങളില് സുരക്ഷ വര്ദ്ധിപ്പിച്ചതായും റിപ്പോര്ട്ടുകള് പറയുന്നു.
Related News
