ഗാസ- ഗാസ മുനമ്പില്‍ 2023 ഒക്ടോബര്‍ 7-ന് ഇസ്രായേല്‍ ആക്രമണം ആരംഭിച്ചതിന് ശേഷം മരണസംഖ്യ 55,959 ആയി ഉയര്‍ന്നതായി മെഡിക്കല്‍ വൃത്തങ്ങള്‍ അറിയിച്ചു. മരിച്ചവരില്‍ ഭൂരിഭാഗവും സ്ത്രീകളും കുട്ടികളുമാണ്.

പരിക്കേറ്റവരുടെ ആകെ എണ്ണം 131,242 ആയി ഉയര്‍ന്നു. തുടര്‍ച്ചയായ ഷെല്ലാക്രമണവും നിലവിലെ അപകടകരമായ സാഹചര്യങ്ങളും കാരണം അവശിഷ്ടങ്ങള്‍ക്കടിയിലും തെരുവുകളിലും കുടുങ്ങിക്കിടക്കുന്ന നിരവധി പേരുടെ അടുത്തെത്താന്‍ ആംബുലന്‍സ്, സിവില്‍ ഡിഫന്‍സ് ടീമുകള്‍ക്ക് സാധിക്കുന്നില്ല.

വാഫ എന്ന ഫലസ്തീന്‍ വാര്‍ത്താ ഏജന്‍സിയുടെ റിപ്പോര്‍ട്ട് അനുസരിച്ച്, കഴിഞ്ഞ 24 മണിക്കൂറിനുള്ളില്‍ 51 പേരുടെ മൃതദേഹങ്ങള്‍ ഗാസയിലെ ആശുപത്രികളില്‍ എത്തിച്ചു. കൂടാതെ, 104 പേര്‍ക്ക് പരിക്കേല്‍ക്കുകയും ചെയ്തു.

മാര്‍ച്ച് 18-ന് വെടിനിര്‍ത്തല്‍ കരാര്‍ ലംഘിക്കപ്പെട്ടതിന് ശേഷം മരിച്ചവരുടെ എണ്ണം 5,647 ആയി ഉയര്‍ന്നതായും, പരിക്കേറ്റവരുടെ എണ്ണം 19,201 ആയതായും റിപ്പോര്‍ട്ടില്‍ പറയുന്നു. ഗാസ മുനമ്പിന്റെ വിവിധ ഭാഗങ്ങളില്‍ ബോംബാക്രമണവും സംഘര്‍ഷങ്ങളും തുടരുകയാണ്.

രക്ഷാപ്രവര്‍ത്തനങ്ങള്‍ തടസ്സപ്പെട്ടതിനാലും വിഭവങ്ങളുടെ അഭാവംമൂലവും അവശിഷ്ടങ്ങള്‍ക്കടിയിലും ആക്രമണമേറ്റ പ്രദേശങ്ങളിലും നിരവധി ഇരകള്‍ ഇപ്പോഴും കുടുങ്ങിക്കിടക്കുകയാണെന്ന് മെഡിക്കല്‍ വൃത്തങ്ങള്‍ സ്ഥിരീകരിച്ചു. നിലവില്‍ ഇവരെ രക്ഷിക്കാന്‍ സാധിക്കുന്നില്ല എന്നും അവര്‍ കൂട്ടിച്ചേര്‍ത്തു.