ടെഹ്റാന്: യു.എസും ഖത്തറും മധ്യസ്ഥത വഹിച്ച വെടിനിര്ത്തല് ലംഘിച്ചുവെന്ന് ആരോപിച്ച് ഇറാന് തലസ്ഥാനമായ ടെഹ്റാനില് 'തീവ്രമായ ആക്രമണങ്ങള്ക്ക്' ഇസ്രായേല് പ്രതിരോധ മന്ത്രി ഇസ്രായേല് കാറ്റ്സ് ഉത്തരവിട്ടു. എന്നാല്, ഇറാന് ആരോപണം നിഷേധിക്കുകയും ഇസ്രായേലിന്റെ ഏതൊരു പ്രകോപനത്തിനും ശക്തമായി തിരിച്ചടിക്കാന് തങ്ങളുടെ സുരക്ഷാ സേന തയ്യാറാണെന്ന് മുന്നറിയിപ്പ് നല്കുകയും ചെയ്തു.
രാവിലെ, ഇറാന് ഇസ്രായേലിനു നേരെ നിരവധി മിസൈല് ആക്രമണങ്ങള് നടത്തിയിരുന്നു. തെക്കന് നഗരമായ ബീര്ഷെബയില് നാല് പേരെങ്കിലും കൊല്ലപ്പെട്ടു.
ഒരു ദിവസം മുന്പ് അമേരിക്ക തങ്ങളുടെ ആണവ കേന്ദ്രങ്ങളില് നടത്തിയ ആക്രമണങ്ങള്ക്ക് പ്രതികാരമായി, തിങ്കളാഴ്ച വൈകുന്നേരം ഖത്തറിലെ യു.എസ് സൈനിക താവളത്തിലേക്ക് ഇറാന് മിസൈല് ആക്രമണം നടത്തിയതോടെ പശ്ചിമേഷ്യ കലുഷിതമായിരുന്നു. എന്നാല് ഇതൊരു പ്രതീകാത്മക ആക്രമണം മാത്രമാണെന്ന് പിന്നീട് വ്യക്തമായി. ഗള്ഫിലുടനീളം നിര്ത്തിവെച്ച വ്യോമഗതാഗതം പുനരാരംഭിച്ചിട്ടുണ്ട്.
ജൂണ് 13-ന് ഇസ്രായേല് ആക്രമണം ആരംഭിച്ചതിന് ശേഷം 13 കുട്ടികള് ഉള്പ്പെടെ 400-ല് അധികം ആളുകള് കൊല്ലപ്പെടുകയും 3,056 പേര്ക്ക് പരിക്കേല്ക്കുകയും ചെയ്തതായി ഇറാന് പറയുന്നു. ഇസ്രായേലില് ഇറാന് നടത്തിയ ആക്രമണങ്ങളില് കുറഞ്ഞത് 24 പേര് കൊല്ലപ്പെട്ടിട്ടുണ്ട്.
Related News
