മദീന: ഇന്ത്യന് ഹജ്ജ് കമ്മിറ്റി മുഖേന പരിശുദ്ധ ഹജ്ജ് കര്മ്മം നിര്വ്വഹിക്കാനെത്തിയ കേരളത്തില് നിന്നുള്ള മലയാളി ഹാജിമാരുടെ മടക്കയാത്ര ആരംഭിച്ചു. ജിദ്ദ വിമാനതാവളം വഴി ഹജ്ജിനെത്തുകയും ഹജ്ജ് കര്മ്മങ്ങള് നിര്വ്വഹിച്ച ശേഷം എട്ട് ദിവസത്തെ മദീന സന്ദര്ശനം പൂര്ത്തീകരിച്ച് മദീന വിമാനതാവളം വഴിയാണ് മലയാളി ഹാജിമാര് നാട്ടിലേക്ക് തിരിക്കുന്നത്.
മദീനയിലെ എട്ട് ദിവസത്തെ താമസവും പുണ്യസ്ഥലങ്ങളിലെ സന്ദര്ശനവും പൂര്ത്തിയാക്കി കോന്കോഡ് ഹോട്ടലില് നിന്നുള്ള 173 പേരടങ്ങുന്ന ആദ്യ മലയാളി ഹജ്ജ് സംഘത്തെ മുത്തവ്വിഫുകള് പ്രത്യേകം തയ്യാറാക്കി നാല് ബസ്സുകളിലായി മദീന അന്താരാഷ്ട്രവിമാനതാവളത്തിലെത്തിക്കുകയും
ഇന്ഡികോ വിമാനത്തില് കോഴിക്കോട് വിമാനത്താവളത്തിലേക്കയക്കുകയുമായിരുന്നു.
നാട്ടിലേക്ക് മടങ്ങുന്ന ആദ്യ സംഘത്തിന് മദീന കെ എം സി സി ഹൃദ്യമായ യാത്രയപ്പാണ് നല്കിയത്. നാട്ടിലേക്ക് മടങ്ങുന്ന ആദ്യ സംഘത്തിന് ഭക്ഷണവും സമ്മാനപൊതികളും നല്കിയാണ് കെ എം സി സി പ്രവര്ത്തകര് യാത്രയയച്ചത്. ജീവിതഭിലാഷമായ പരിശുദ്ധ ഹജജ് കര്മ്മവും പ്രവചക സന്നിധിയില് സലാം ചെല്ലിയും മസ്ജിദുന്നബവ്വിയിലെ പ്രാര്ഥനകളും പൂര്ത്തികരിച്ച് മനം നിറഞ്ഞ സന്തോഷത്തിലാണ് ഓരോ ഹാജിമാരും മദീന നഗരിയോട് വിട പറയുന്നത്. ഹാജിമാര് മദീനയിലെത്തിയ സമയം മുതല് രാപകല് വ്യത്യാസമില്ലാതെ ഹാജിമാരുടെ സേവനങ്ങള്ക്കായി കെ എം സി സി പ്രവര്ത്തകര് സജീവമായിരുന്നു.
നാസര് തടത്തില്, അഷ്റഫ് ഒമാനൂര് , ജലീല് കുറ്റ്യാടി, ഒ.കെ റഫീഖ് , ഷെരീഫ് കാസര്ഗോഡ് , അഷ്റഫ് അഴിഞ്ഞിലം , സൈദുഹാജി, ജലീല് നഹാസ് എന്നിവര് നേതൃത്വം നല്കി.
Related News
