ജിദ്ദ: സൗദി അറേബ്യയുടെ മധ്യ, വടക്കന്‍, കിഴക്കന്‍ ഭാഗങ്ങളില്‍ ജൂലൈ, ഓഗസ്റ്റ് മാസങ്ങളില്‍ ഉയര്‍ന്ന താപനില പ്രതീക്ഷിക്കുന്നതായി നാഷണല്‍ സെന്റര്‍ ഫോര്‍ മെറ്റീരിയോളജി (എന്‍സിഎം) അറിയിച്ചു.

റിയാദ്, ഖസീം, ഹായില്‍, കിഴക്കന്‍, വടക്കന്‍ അതിര്‍ത്തി പ്രദേശങ്ങളിലെ ചില ഭാഗങ്ങളില്‍ സാധാരണയേക്കാള്‍ 1 ഡിഗ്രി സെല്‍ഷ്യസ് താപനില വര്‍ദ്ധനവ് ഉണ്ടാകുമെന്നും, ആഗസ്റ്റില്‍ അല്‍ജൗഫ്, തബൂക്ക്, ഖസീം, ഹായില്‍, കിഴക്കന്‍ മേഖലകളില്‍ 1.2 ഡിഗ്രി സെല്‍ഷ്യസ് താപനില ഉയരുമെന്നും കാലാവസ്ഥാ നിരീക്ഷണ കേന്ദ്രം പ്രവചിച്ചു.

നജ്റാന്‍, ജിസാന്‍, അല്‍-ബാഹ, അസീര്‍, മക്ക, മദീന, തെക്കന്‍ റിയാദ്, കിഴക്കന്‍ മേഖലകള്‍ എന്നിവിടങ്ങളില്‍, പ്രത്യേകിച്ച് ജൂലൈ, ഓഗസ്റ്റ് മാസങ്ങളില്‍ സാധാരണയേക്കാള്‍ ഉയര്‍ന്ന മഴ ലഭിച്ചേക്കുമെന്നും എന്‍സിഎം പ്രവചിച്ചു. രാജ്യത്തിന്റെ ബാക്കി ഭാഗങ്ങളില്‍ സാധാരണ മഴ ലഭിക്കുമെന്നാണ് പ്രതീക്ഷ.

ജൂണ്‍ മുതല്‍ ഓഗസ്റ്റ് വരെയുള്ള മാസങ്ങള്‍ ഉള്‍ക്കൊള്ളുന്ന 2025 വേനല്‍ക്കാല പ്രവചനം 1991 മുതല്‍ 2020 വരെയുള്ള കാലാവസ്ഥാ സാഹചര്യങ്ങളെ അടിസ്ഥാനമാക്കിയുള്ളതാണെന്ന് എസ്പിഎ റിപ്പോര്‍ട്ട് ചെയ്തു. റിപ്പോര്‍ട്ട് അനുസരിച്ച്, 2010 ജൂണില്‍ ജിദ്ദയിലാണ് ഏറ്റവും ഉയര്‍ന്ന താപനില 52°C രേഖപ്പെടുത്തിയത്, 2024 ജൂലൈയില്‍ അല്‍-അഹ്സയില്‍ 51.3°C രേഖപ്പെടുത്തി.

2024 ഓഗസ്റ്റില്‍ തെക്കുപടിഞ്ഞാറന്‍ മേഖലയായ ജിസാനില്‍ 113 മില്ലിമീറ്റര്‍ മഴ രേഖപ്പെടുത്തി. 1995 ജൂലൈയില്‍ 67.6 മില്ലിമീറ്റര്‍ മഴ ലഭിച്ചതായും റിപ്പോര്‍ട്ടില്‍ പറയുന്നു.