റിയാദ്- സൗദി അറേബ്യയില് വിവിധ തരത്തിലുള്ള വിസിറ്റ് വിസ കാലാവധി കഴിഞ്ഞവര്ക്കും അവരുടെ സ്പോണ്സര്മാര്ക്കും ആശ്വാസവുമായി സൗദി പാസ്പോര്ട്ട് വിഭാഗം. വിസിറ്റ് വിസ കാലാവധി കഴിഞ്ഞവര്ക്ക് നിശ്ചിത ഫീസും പിഴയും നല്കി വിസ പുതുക്കി നാട്ടിലേക്ക് പോകാനുള്ള സംവിധാനത്തിന് സൗദി പാസ്പോര്ട്ട് വിഭാഗം അംഗീകാരം നല്കിയതോടെയാണിത്. ജൂണ് 26 മുതല് ഒരു മാസത്തേക്കാണ് പദ്ധതിയുടെ ആനുകൂല്യം ലഭ്യമാകുക. ഒരു മാസത്തിനകം പദ്ധതി പ്രയോജനപ്പെടുത്തണമെന്നും പദ്ധതി നടപ്പിലാക്കാന് തുടങ്ങിയതായും ജനറല് ഡയറക്ടറേറ്റ് ഓഫ് പാസ്പോര്ട്ട് അറിയിച്ചു.
സൗദി ആഭ്യന്തര മന്ത്രാലയത്തിന്റെ ഓണ്ലൈന് പ്ലാറ്റ്ഫോമായ അബ്ഷിറിലെ 'തവാസുല്' സേവനം വഴിയാണ് ഇതിന് അപേക്ഷ നല്കേണ്ടത്. ബിസിനസ്, തൊഴില്, ഫാമിലി വിസിറ്റ്, സിംഗിള് എന്ട്രി, മള്ട്ടിപ്പിള് എന്ട്രി വിസകള് അടക്കം കാലാവധി തീര്ന്ന എല്ലായിനം വിസകളിലും സൗദിയില് കഴിയുന്നവര്ക്ക് എളുപ്പത്തിലും നിയമാനുസൃതവും രാജ്യം വിടാന് സാധിക്കും.
അതേസമയം, ജോലി സ്ഥലത്തു നിന്ന് ഒളിച്ചോടിയതായി റിപ്പോര്ട്ട് ചെയ്യപ്പെട്ട (ഹുറൂബാക്കല്) വിസിറ്റ് വിസക്കാര്ക്കും ഈ പദ്ധതി പ്രയോജനപ്പെടുത്താനാകും. ഇവരുടെ പേരിലുള്ള ഹുറൂബ് റദ്ദാക്കുകയാണ് ഇതിന്റെ ആദ്യപടി. സ്പോണ്സര്മാരില്ലാത്ത വിസിറ്റ് വിസക്കാര്ക്ക് ഡിജിറ്റല് ഐജഡന്റിറ്റി കാര്ഡ് ആക്ടിവേറ്റ് ചെയ്ത് അബ്ശിര് പ്ലാറ്റ്ഫോമിലെ തവാസുല് സേവനം വഴി വിസ പുതുക്കാന് അപേക്ഷ സമര്പ്പിക്കാം.
ഈ സേവനം പ്രയോജനപ്പെടുത്താന് ഏതെങ്കിലും ഓഫീസുകളെ സമീപിക്കേണ്ടതില്ല. സ്പോണ്സര്മാര്ക്ക് അവരുടെ തന്നെ അബ്ശിറില് പ്രവേശിച്ച് ഈ സേവനം പ്രയോജനപ്പെടുത്താവുന്നതാണ്. വിസാ കാലാവധി അവസാനിച്ച് എത്ര കാലമായി രാജ്യത്ത് കഴിയുന്നവര്ക്കും ഇപ്പോള് പ്രഖ്യാപിച്ച പദ്ധതി പ്രയോജനപ്പെടുത്തി വിസ പുതുക്കി സൗദിയില്നിന്ന് പുറത്തുപോകാം.
Related News
