ദോഹ: ഖത്തറിലെ അമേരിക്കന്‍ സൈനിക താവളം ലക്ഷ്യമാക്കി ഇറാന്‍ മിസൈല്‍ ആക്രമണം നടത്തുമ്പോള്‍ ഖത്തര്‍ എയര്‍വേയ്‌സിന്റെ 90 വിമാനങ്ങളില്‍ 20,000 യാത്രക്കാര്‍ ദോഹയിലേക്കു സഞ്ചരിക്കുകയായിരുന്നെന്നു കമ്പനി ചീഫ് എക്‌സിക്യൂട്ടീവ് വെളിപ്പെടുത്തി. ആക്രമണത്തിന്റെ സൂചന ലഭിച്ചപ്പോള്‍ തന്നെ വിമാനങ്ങള്‍ വഴി തിരിച്ചു വിടാന്‍ നിര്‍ദേശം നല്‍കുകയായിരുന്നു. ഈ സമയം ദോഹയിലെ ഹമദ് രാജ്യാന്തര വിമാനത്താവളത്തില്‍ 100 വിമാനങ്ങള്‍ ടേക്ക് ഓഫിനു തയാറെടുക്കുകയായിരുന്നുവെന്ന് കമ്പനി അറിയിച്ചു.

ഏതാനും വിമാനങ്ങള്‍ റണ്‍വേയില്‍ പ്രവേശിച്ചിരുന്നു. ബാക്കിയുള്ളവ റണ്‍വേയിലേക്കുള്ള വഴിയില്‍ കാത്തുനില്‍ക്കുകയായിരുന്നു. നിമിഷങ്ങള്‍ക്കുള്ളില്‍ വിമാനങ്ങള്‍ തിരിച്ചു വിളിച്ചു യാത്രക്കാരെ സുരക്ഷിത കേന്ദ്രങ്ങളിലാക്കി. 4600 യാത്രക്കാര്‍ക്കു 3200 ഹോട്ടല്‍ മുറികളില്‍ താമസസൗകര്യം നല്‍കി.
35000 പേര്‍ക്കു ഭക്ഷണവും വെള്ളവും നല്‍കി. ആക്രമണ സമയത്തു 10000 യാത്രക്കാര്‍ വിമാനത്താവളത്തിലുണ്ടായിരുന്നു. 151 വിമാനങ്ങളുടെ യാത്രയാണ് ഒറ്റയടിക്ക് മുടങ്ങിയതെന്ന് കമ്പനി വ്യക്തമാക്കി.