മദീന - രാജ്യത്ത് മയക്കുമരുന്ന് കടത്ത് തടയുന്നതിനുള്ള കര്ശന നടപടികളുടെ ഭാഗമായി, മദീനയില് ഒരു നൈജീരിയന് പൗരന്റെ വധശിക്ഷ നടപ്പാക്കിയതായി ആഭ്യന്തര മന്ത്രാലയം ഇന്ന് പ്രസ്താവനയിലൂടെ അറിയിച്ചു. അബിദിന് അലാസു എന്കോണ്മി യേസ എന്നയാളാണ് കൊക്കെയ്ന് സൗദി അറേബ്യയിലേക്ക് കടത്താന് ശ്രമിച്ചത്. സുരക്ഷാ ഉദ്യോഗസ്ഥര് ഇയാളെ പിടികൂടുകയും അന്വേഷണത്തില് കുറ്റം തെളിയിക്കപ്പെടുകയും ചെയ്തു. വിചാരണക്ക് ശേഷം കോടതി ഇയാളെ വധശിക്ഷക്ക് വിധിച്ചു.
സുപ്രീം കോടതി ഇത് ശരിവെക്കുകയും ചെയ്തതോടെ ശിക്ഷ അന്തിമമായി. ശരിഅത്ത് നിയമപ്രകാരം വധശിക്ഷ നടപ്പാക്കാന് രാജകീയ ഉത്തരവും പുറപ്പെടുവിച്ചു. മയക്കുമരുന്നിന്റെ വിപത്തില് നിന്ന് പൗരന്മാരുടെയും താമസക്കാരുടെയും സുരക്ഷ ഉറപ്പാക്കുന്നതില് സൗദി അറേബ്യന് സര്ക്കാര് പ്രതിജ്ഞാബദ്ധമാണെന്ന് ആഭ്യന്തര മന്ത്രാലയം ഊന്നിപ്പറഞ്ഞു. മയക്കുമരുന്ന് കടത്തുന്നവര്ക്കും വില്ക്കുന്നവര്ക്കും നിയമം അനുശാസിക്കുന്ന ഏറ്റവും കഠിനമായ ശിക്ഷ നല്കുമെന്നും മന്ത്രാലയം മുന്നറിയിപ്പ് നല്കി. ഇത് നിരപരാധികളുടെ ജീവന് നഷ്ടപ്പെടുത്തുന്നതിനും യുവജനങ്ങളെയും സമൂഹത്തെയും ഗുരുതരമായി ദുഷിപ്പിക്കുന്നതിനും അവരുടെ അവകാശങ്ങള് ലംഘിക്കുന്നതിനും കാരണമാകുന്നതിനാലാണിത്. ഇത്തരം കുറ്റകൃത്യങ്ങളില് ഏര്പ്പെടുന്ന ആര്ക്കും നിയമപരമായ ശിക്ഷയായിരിക്കും വിധിയെന്നും മന്ത്രാലയം ആവര്ത്തിച്ചു.
Related News
