ജിദ്ദ: മനുഷ്യസമൂഹത്തിന്റെ നിലനില്പ്പിന് അത്യാവശ്യമായ മൂല്യങ്ങള് ഏതെങ്കിലും കാലഘട്ടത്തില് മാത്രം പ്രസക്തമല്ലെന്നും അത് ശാശ്വതമായി നിലനില്ക്കേണ്ട ഒന്നാണെന്നും അരീക്കോട് സുല്ലമുസ്സലാം അറബിക് കോളേജ് മുന് പ്രിന്സിപ്പലും പ്രമുഖ ഇസ്ലാഹി പ്രഭാഷകനും എഴുത്തുകാരനുമായ ആരിഫ് സൈന് അഭിപ്രായപ്പെട്ടു. ജിദ്ദ ഇന്ത്യന് ഇസ്ലാഹി സെന്ററില് ഖുര്ആന് പഠിതാക്കളുടെ സംഗമത്തില് 'മഹത്തായ മദീന വിദ്യാപീഠം' എന്ന വിഷയത്തില് ആമുഖപ്രഭാഷണം നിര്വ്വഹിക്കുകയായിരുന്നു അദ്ദേഹം.
ഇന്ന് മൂല്യങ്ങളെ തിരസ്കരിക്കാനുള്ള ശ്രമങ്ങള് ലോകത്ത് വ്യാപകമായി നടക്കുകയാണ്.'സദാചാരം' എന്നത് പോലും ഒരു അശ്ലീല പദമായി ആളുകള് പരിഗണിക്കാന് തുടങ്ങിയിരിക്കുന്നു. മനുഷ്യസമൂഹത്തില് നിന്ന് ഇങ്ങനെ മൂല്യങ്ങള് നഷ്ടപ്പെടുമ്പോള് അത് പുനരുജ്ജീവിപ്പിക്കുന്ന ദൗത്യമായിരുന്നു എക്കാലത്തും ലോകത്ത് പ്രവാചകന്മാര് നിര്വ്വഹിച്ചിരുന്നത്. എന്നാല് മൊബൈല് ഫോണും ഇന്റര്നെറ്റും കയ്യിലുള്ള ഇക്കാലത്ത് നമ്മള് അറിവുകള് തേടി എങ്ങോട്ടും പോകേണ്ട കാര്യമില്ലെന്നും നമുക്ക് ലഭിക്കുന്ന ആവശ്യമില്ലാത്ത അറിവുകള് ഒഴിവാക്കാനാണ് ഇന്ന് നമ്മള് ശ്രദ്ധിക്കേണ്ടതെന്നും അദ്ദേഹം ഉണര്ത്തി.
തുടര്ന്ന് ഫിറോസ് കൊയിലാണ്ടി സമാപന പ്രസംഗം നിര്വഹിച്ചു. സകരിയ്യ തിരുവനന്തപുരം, ഹെസനത്ത്, ജെനി അന്വര്, മറിയം തുടങ്ങിയ പഠിതാക്കള് ഖുര്ആന് പഠനംകൊണ്ടുള്ള അനുഭവങ്ങള് സദസ്സുമായി പങ്കുവെച്ചു. കഴിഞ്ഞ നവംബറിലും ഈ വര്ഷം മെയ് മാസത്തിലും ഇസ്ലാഹി സെന്ററിന്റെ നേതൃത്വത്തില് ജിദ്ദയില് നടത്തിയ ഖുര്ആന് പരീക്ഷകളില് വിജയികളായവര്ക്ക് ക്യാഷ് പ്രൈസും സമ്മാനങ്ങളും വിതരണം ചെയ്തു.
നവംബറില് നടന്ന പരീക്ഷയില് വിജയികളായ ഉമ്മു നിദ (ഫസ്റ്റ് ), ജെനി അന്വര് (സെക്കന്റ് ), ഷരീഫ് ബാവ, ആമിന വാളപ്ര (തേര്ഡ് ) എന്നിവര് ക്യാഷ് അവാര്ഡിന് അര്ഹരായപ്പോള് മെയ് മാസത്തില് സംഘടിപ്പിച്ച പരീക്ഷയില് ലുബ്ന സി.ടി (ഫസ്റ്റ് ), സുമയ്യ എ.കെ (സെക്കന്റ് ), ഹെസനത്ത്, സെനിയ്യ (തേര്ഡ് ) എന്നിവര് സമ്മാനാര്ഹരായി. ആരിഫ് സൈന് സമ്മാനദാനം നിര്വഹിച്ചു. 'ലേണ് ദ ഖുര്ആന്' കണ്വീനര് അബ്ദുറഹ്മാന് കെ.ടി, കമ്മിറ്റി അംഗം ആഷിഖ് മഞ്ചേരി തുടങ്ങിയവര് പരിപാടികള്ക്ക് നേതൃത്വം നല്കി. ഷിഹാബ് സലഫി അധ്യക്ഷത വഹിച്ച ചടങ്ങില് നൂരിഷ വള്ളിക്കുന്ന് സ്വാഗതവും നയീം മോങ്ങം നന്ദിയും പറഞ്ഞു.
Related News
