റിയാദ് - സൗദി അറേബ്യയുടെ ടൂറിസം മേഖല 2024-ല്‍ അഭൂതപൂര്‍വമായ വളര്‍ച്ചയാണ് രേഖപ്പെടുത്തിയത്. രാജ്യത്തെ ഹോട്ടല്‍ അപ്പാര്‍ട്ട്മെന്റ് മേഖല മാത്രം 30 ദശലക്ഷത്തിലധികം സന്ദര്‍ശകരെയാണ് ആകര്‍ഷിച്ചത്. സ്വദേശികളും വിദേശികളുമായി ആകെ 115.9 ദശലക്ഷം സന്ദര്‍ശകരാണ് സൗദി അറേബ്യയില്‍ എത്തിയത്. സൗദി വിഷന്‍ 2030-ന്റെ ഭാഗമായി ടൂറിസത്തെ ഒരു പ്രധാന സാമ്പത്തിക മേഖലയായി ഉയര്‍ത്തിക്കൊണ്ടുവരുന്നതിന്റെ ഭാഗമായാണ് ഈ വളര്‍ച്ച.

കുടുംബങ്ങള്‍, താമസക്കാര്‍, ഗള്‍ഫ്, മിഡില്‍ ഈസ്റ്റ് എന്നിവിടങ്ങളില്‍നിന്നുള്ള വിനോദസഞ്ചാരികള്‍ എന്നിവര്‍ക്കിടയില്‍ ഹോട്ടല്‍ അപ്പാര്‍ട്ട്മെന്റുകള്‍ക്ക് വലിയ സ്വീകാര്യതയുണ്ട്. വിശാലമായ താമസ സൗകര്യങ്ങള്‍, വീടിന് സമാനമായ സേവനങ്ങള്‍, ദീര്‍ഘകാല, ഇടത്തരം താമസങ്ങള്‍ക്ക് അനുയോജ്യമായ സാഹചര്യങ്ങള്‍ എന്നിവ ഹോട്ടല്‍ അപ്പാര്‍ട്ട്മെന്റുകളെ പ്രിയങ്കരമാക്കുന്നു.

റിയാദ്, ജിദ്ദ, മക്ക, മദീന തുടങ്ങിയ പ്രധാന നഗരങ്ങളില്‍ ഹോട്ടല്‍ അപ്പാര്‍ട്ട്മെന്റുകള്‍ക്ക് വലിയ തോതിലുള്ള ആവശ്യകതയാണ് വര്‍ധിച്ചത്. അബഹ, അല്‍-ബാഹ, തായിഫ് തുടങ്ങിയ പ്രദേശങ്ങളും തങ്ങളുടെ വൈവിധ്യമാര്‍ന്ന പ്രകൃതിദത്തവും സാംസ്‌കാരികവുമായ ആകര്‍ഷണങ്ങളിലൂടെ ശ്രദ്ധേയമായി.

ടൂറിസം മന്ത്രാലയത്തിന്റെ കണക്കനുസരിച്ച്, 2024 അവസാനത്തോടെ രാജ്യത്ത് ലൈസന്‍സുള്ള ഹോട്ടല്‍ അപ്പാര്‍ട്ട്മെന്റുകളുടെ എണ്ണം ഏകദേശം 2,262 ആയി ഉയര്‍ന്നു. 4,400-ലധികം ലൈസന്‍സുള്ള താമസ സൗകര്യങ്ങളില്‍ ഏകദേശം 476,000 ഹോട്ടല്‍ മുറികളാണുള്ളത്. ഈ കണക്കുകള്‍ സൗദി അറേബ്യയുടെ ടൂറിസം മേഖലയുടെ മുന്നേറ്റത്തെയും വിഷന്‍ 2030 ലക്ഷ്യങ്ങള്‍ കൈവരിക്കുന്നതിലുള്ള പുരോഗതിയെയും എടുത്തു കാണിക്കുന്നു.