കോട്ടയം: ഈരാറ്റുപേട്ട പനയ്ക്കപാലത്ത് ദമ്പതികള്‍ മരിച്ച നിലയില്‍. രാമപുരം കൂടപ്പുലം സ്വദേശി വിഷ്ണു എസ് നായര്‍ (36), ഭാര്യ രശ്മി (35) എന്നിവരാണ് മരിച്ചത്. ഇന്ന് രാവിലെയാണ് ദമ്പതികളെ മരിച്ച നിലയില്‍ കണ്ടെത്തിയത്. ഇരുവരും വാടകയ്ക്ക് താമസിക്കുന്ന പനയ്ക്കപാലത്തെ വീട്ടിലാണ് മൃതദേഹം കണ്ടെത്തിയത്. കൈകള്‍ ചേര്‍ത്തു കെട്ടി സിറിഞ്ച് കുത്തിവെച്ച നിലയിലായിരുന്നു മൃതദേഹങ്ങള്‍. മരുന്നു കുത്തിവെച്ചുള്ള ആത്മഹത്യാണെന്ന് സംശയിക്കുന്നു. ഇരുവരുടെയും ആത്മഹത്യക്കു പിന്നില്‍ കടുത്തുരുത്തിയിലെ ബ്ലേഡ് മാഫിയ സംഘമാണെന്ന് പറയുന്നു. കഴിഞ്ഞ ദിവസം ബ്ലേഡ് മാഫിയ സംഘം ഇവരുടെ വീട്ടിലെത്തി വിഷ്ണുവിനെ മര്‍ദിക്കുകയും ഭീഷണിപ്പെടുത്തുകയും ചെയ്തതായി പറയുന്നു.

ഇന്ന് രാവിലെ ഫോണില്‍ ഇരുവരെയും ബന്ധപ്പെടാന്‍ കഴിയാതായതോടെ സുഹൃത്തുക്കളും വീട്ടുടമസ്ഥനും വീട്ടിലെത്തി നടത്തിയ പരിശോധനയിലാണ് മൃതദേഹം കണ്ടെത്തിയത്. ഇവര്‍ കിടന്നിരുന്ന മുറിയുടെ വാതിലുകള്‍ അകത്ത് നിന്ന് പൂട്ടിയ നിലയിലായിരുന്നു. ഇരുവരുടേയും കൈകള്‍ ടേപ്പ് ഉപയോഗിച്ച് കെട്ടിയനിലയിലായിരുന്നു.

ഈരാറ്റുപേട്ട സണ്‍റൈസ് ആശുപത്രിയിലെ നഴ്‌സിങ് സൂപ്രണ്ടാണ് രശ്മി. വിഷ്ണു കരാര്‍ ജോലികള്‍ ഏറ്റെടുത്ത് ചെയ്തു വരികയായിരുന്നു. ദമ്പതികള്‍ക്ക് സാമ്പത്തിക പ്രയാസങ്ങള്‍ ഉണ്ടായിരുന്നതായാണ് വിവരം. അന്വേഷണം നടത്തി വരികയാണെന്ന് പൊലീസ് അറിയിച്ചു. ആറുമാസമായി ദമ്പതികള്‍ പനയ്ക്കപ്പാലത്താണ് വാടകയ്ക്ക് താമസിക്കുന്നത്.