അബൂദാബി : 300 ദിര്‍ഹത്തിന്റെ ടെലിഫോണ്‍ ബില്ലിനെച്ചൊല്ലിയുണ്ടായ തര്‍ക്കത്തില്‍ അബൂദാബിയില്‍ ഒരു ഇന്ത്യന്‍ പൗരന്‍ കൊല്ലപ്പെട്ട് 17 വര്‍ഷങ്ങള്‍ക്ക് ശേഷം, ഇന്ത്യയിലെ സെന്‍ട്രല്‍ ബ്യൂറോ ഓഫ് ഇന്‍വെസ്റ്റിഗേഷന്‍ (സി ബി ഐ) കൊലയാളിക്കെതിരെ കുറ്റപത്രം സമര്‍പ്പിച്ചു. പ്രതിയായ ഇന്ദര്‍ജിത് സിങ്ങിനെതിരെ ഇന്ത്യന്‍ ശിക്ഷാനിയമത്തിലെ 302-ാം വകുപ്പ് പ്രകാരം പ്രോസിക്യൂഷന്‍ ആരംഭിച്ചതായി സി ബി ഐ വ്യക്തമാക്കി.

2008 ആഗസ്റ്റ് 28നാണ് കേസ് നടന്നത്. രാമ ലിംഗം നടേശന്‍ എന്നയാളെ കുത്തിക്കൊലപ്പെടുത്തുകയായിരുന്നു. ക്രെഡിറ്റ് സിം കാര്‍ഡുകള്‍ വാങ്ങിയ വകയില്‍ ഇയാള്‍ കുടിശ്ശിക വരുത്തിയതോടെയാണ് തര്‍ക്കമുണ്ടായത്. കുടിശ്ശിക തുക 300 ദിര്‍ഹത്തിലെത്തി. തൊഴിലുടമയോട് ശമ്പളത്തില്‍ നിന്ന് കുടിശ്ശിക ഈടാക്കാന്‍ ആവശ്യപ്പെട്ടപ്പോള്‍ നടേശനെ കൊല്ലാന്‍ സിങ് പദ്ധതിയിട്ടു. കത്തി ഉപയോഗിച്ച് ആക്രമിക്കുകയും മാരകമായി പരുക്കേല്‍പ്പിക്കുകയും ചെയ്തു.

തെളിവുകള്‍ ശേഖരിക്കുന്നതിന് സിബിഐ യു എ ഇ അധികൃതരുമായി ബന്ധപ്പെടുകയും നടപടികള്‍ എടുക്കുകയുമായിരുന്നു. ന്യൂഡല്‍ഹിയിലെ പ്രത്യേക കോടതിയിലാണ് കുറ്റപത്രം സമര്‍പ്പിച്ചത്. ഇതിനുപുറമെ, 2011 ല്‍ ബഹ്‌റൈനില്‍ തൊഴിലുടമയെ കൊലപ്പെടുത്തിയതിന് മറ്റൊരു ഇന്ത്യന്‍ പൗരനായ സുഭാഷ് ചന്ദര്‍ മഹലയ്‌ക്കെതിരെയും സി ബി ഐ കുറ്റപത്രം സമര്‍പ്പിച്ചിട്ടുണ്ട്.