ജെയ്പൂര്: രാജസ്ഥാനിലെ ജയ്സമാല്മിറിനടുത്ത് അന്താരാഷ്ട്ര അതിര്ത്തി കടന്നെത്തിയ പാകിസ്താനി ദമ്പതികളായ രവി കുമാര് (17) ശാന്തി ഭായ് (15) എന്നിവരെ മരിച്ച നിലയില് കണ്ടെത്തി. മരുഭൂമി താണ്ടി കുടിവെള്ളം കിട്ടാതെയുണ്ടായ നിര്ജലീകരണമാണ് മരണകാരണമെന്ന് സംശയിക്കുന്നു. രാജസ്ഥാനിലെ ജയ്സാല്മീറിലെ സാധേവാല സെക്ടറില് ഇന്ത്യന് ഭാഗത്തുള്ള അന്താരാഷ്ട്ര അതിര്ത്തിയില് നിന്ന് 10 മുതല് 12 കിലോമീറ്റര് അകലെയായിട്ടാണ് ഇവര് മരിച്ചു കിടക്കുന്നത് കണ്ടത്. ഗജസിംഗ് ഗ്രാമത്തിനടുത്തുള്ള ഒരു മണല്ക്കൂനയില് ഒരു ഇടയനാണ് ഇവരുടെ മൃതദേഹങ്ങള് കണ്ടത്. തുടര്ന്ന് പോലീസില് വിവരം അറിയിക്കുകയായിരു്ന്നു.
പാകിസ്താനിലെ സൗത്ത് സിന്ധ് പ്രൊവിന്സിലെ ഗോട്കി ജില്ലയില് നിന്നുള്ളവരാണ് ദമ്പതികള്. വീട്ടുകാര് പറഞ്ഞുറപ്പിച്ച ഇവരുടെ വിവാഹം നാല് മാസം മുന്പാണ് നടന്നത്. ഇന്ത്യയിലെത്തി ഭാവി ജീവിതം കെട്ടിപ്പടുക്കാനായി വിസക്ക് ഇരുവരും അപേക്ഷിച്ചിരുന്നു. എന്നാല് വിസ ലഭിച്ചില്ല.
തുടര്ന്ന് അനധികൃതമായി അതിര്ത്തി കടക്കാന് ദമ്പതികള് തീരുമാനിക്കുകയായിരുന്നു. ഒരാഴ്ച മുന്പാണ് സ്വന്തം ഗ്രാമത്തില് നിന്ന് ഇവര് യാത്ര പുറപ്പെട്ടത്.
അതിര്ത്തി കടന്നെങ്കിലും ഭിഭിയാന് മരുഭൂമിയില് വെച്ച് ഇവര്ക്ക് വഴി തെറ്റുകയായിരുന്നു. കൊണ്ടുവന്ന ജലം തീര്ന്നുപോയതിനാല് ദാഹവും നിര്ജലീകരണവും മൂലമാണ് മരിച്ചതെന്നാണ് പ്രാഥമിക നിഗമനം.
ഇവര് എങ്ങനെ അതിര്ത്തി കടന്നുവന്നുവെന്ന കാര്യം പോലീസ് അന്വേഷിക്കുകയാണ്. മൃതദേഹങ്ങള് പോസ്റ്റ്മോര്ട്ടത്തിനായി ആശുപത്രിയിലേക്ക് നീക്കി. മൃതദേഹത്തിന് നാലഞ്ചു ദിവസത്തെ പഴക്കമുണ്ടാകും. പാക്കിസ്ഥാന് മൊബൈല് സിം ഇവരില്നിന്ന് കണ്ടെടുത്തിട്ടുണ്ട്.
Related News
