കൊച്ചി: സൗദി അറേബ്യയിലെ ജിദ്ദയിലുള്ള പ്രവാസികള്‍ക്ക് ആശ്വാസം പകര്‍ന്ന് ഇന്ത്യയിലെ ബജറ്റ് എയര്‍ലൈനായ ആകാശ എയറിന്റെ കൊച്ചി-ജിദ്ദ നേരിട്ടുള്ള സര്‍വീസിന് തുടക്കം. ജൂണ്‍ 29 ഞായറാഴ്ചയാണ് സര്‍വീസുകള്‍ക്ക് തുടക്കമായത്. ശനി, തിങ്കള്‍ ദിവസങ്ങളില്‍ ഓരോ സര്‍വീസും ഞായറാഴ്ച രണ്ട് സര്‍വീസുകള്‍ വീതവുമുണ്ടായിരിക്കും. ഇതോടെ എല്ലായിപ്പോഴും അമിത നിരക്കും തിരക്കും അനുഭവപ്പെടുന്ന കൊച്ചി ജിദ്ദ സെക്ടററില്‍ ടിക്കറ്റ് നിരക്ക് കുറയാനും കൂടുതല്‍ പേര്‍ക്ക് യാത്ര ചെയ്യാനുമുള്ള അവസരമാണ് തുറന്നു കിട്ടിയിരിക്കുന്നത്. ഹജ് ഉംറ തീര്‍ഥാടകര്‍ക്കും സൗദി സന്ദര്‍ശിക്കാനാഗ്രഹിക്കുന്ന വിനോദ സഞ്ചാരികള്‍ക്കും അതുപോലെ കേരളത്തിലെത്താന്‍ താല്‍പര്യമുള്ള സൗദികള്‍ക്കും കുറഞ്ഞ നിരക്കില്‍ യാത്ര് ചെയ്യാന്‍ സര്‍വീസ് സഹായകരമാവും. ദീര്‍ഘദൂര, ഹ്രസ്വദൂര റൂട്ടുകള്‍ക്ക് അനുയോജ്യമായ ആധുനികവും ഇന്ധനക്ഷമതയുള്ളതുമായ 186 ഇക്കോണമി സീറ്റുകള്‍ വീതമുള്ള ബോയിംഗ് 737 മാക്‌സ് എട്ട് വിമാനങ്ങളാണ് സര്‍വീസുകള്‍ക്കായി ഉപയോഗിക്കുന്നത്.

ശനി, തിങ്കള്‍ ദിവസങ്ങളില്‍ വൈകീട്ട് 6.10 ന് കൊച്ചിയില്‍ നിന്നും പുറപ്പെടുന്ന വിമാനം രാത്രി 9.55 ന് ജിദ്ദയിലെത്തും തിരിച്ച് ജിദ്ദയില്‍ നിന്നു പിറ്റേന്ന് രാവിലെ 7.45 ന് പുറപ്പെടുന്ന വിമാനം വൈകീട്ട് 4.45 ന് കൊച്ചിയിലെത്തും. ഞായറാഴ്ചയിലെ ആദ്യ വിമാനം പുലര്‍ച്ചെ മൂന്ന് മണിക്ക് കൊച്ചിയില്‍ നിന്നും പുറപ്പെട്ട് രാവിലെ 6.45 ന് ജിദ്ദയിലിറങ്ങും. ഈ വിമാനം തിരിച്ച് തിങ്കളാഴ്ച പുലര്‍ച്ചെ 1.10 ന് ജിദ്ദയില്‍ നിന്ന് പുറപ്പെട്ട് രാവിലെ 10.10 ന് കൊച്ചിയിലിറങ്ങും. രണ്ടാം വിമാനം രാത്രി 8.25 ന് കൊച്ചിയില്‍ നിന്നു പുറപ്പെട്ട് രാത്രി 12.10 ന് ജിദ്ദയിലെത്തുംം. ഇത് തിരിച്ച് തിങ്കളാഴ്ച രാത്രി 10.55 ന് പുറപ്പെട്ട് രാവിലെ 7.55 ന് കൊച്ചിയിലെത്തും. ആഗസ്റ്റ് മൂന്ന് ഞായര്‍ മുതലായിരിക്കും രണ്ട് വീതം സര്‍വീസുകള്‍ ആരംഭിക്കുക. നേരിട്ടുള്ള സര്‍വീസുകള്‍ക്ക് പുറമെ എല്ലാ ദിവസവും മുംബൈ കണക്റ്റ് ചെയ്തും കൊച്ചി-ജിദ്ദ-കൊച്ചി സര്‍വീസുകള്‍ ലഭ്യമാണെന്ന്് എയര്‍ലൈന്‍സ് അധികൃതര്‍ പറഞ്ഞു.

കഴിഞ്ഞ വര്‍ഷം മാര്‍ച്ചില്‍ മുംബൈയില്‍ നിന്ന് ദോഹയിലേക്ക് നേരിട്ടുള്ള സര്‍വീസുകള്‍ ആരംഭിച്ചായിരുന്നു ആകാശ എയര്‍ തങ്ങളുടെ മിഡില്‍ ഈസ്റ്റിലേക്കുള്ളസര്‍വീസുകള്‍ക്ക് തുടക്കമിട്ടത്. തുടര്‍ന്ന് അബുദാബിയിലേക്കും സര്‍വീസുകള്‍ ആരംഭിച്ചു. റിയാദ്, കുവൈത്ത് എന്നിവിടങ്ങളിലേക്കും ഉടന്‍ സര്‍വീസുകള്‍ ആരംഭിക്കുമെന്നും ്അധികൃതര്‍ വ്യക്തമാക്കി.