ദുബായ് : റോഡില് കാറുകള് കടന്നു പോകുമ്പോള് സംഗീതം കേള്ക്കുന്ന ഒരു പദ്ധതി ഫുജൈറയില് യാഥാര്ഥ്യമായി. അറബ് ലോകത്ത് ആദ്യമായാണ് ഈയൊരു പദ്ധതി. ഫുജൈറ നഗരത്തിലേക്കുള്ള പ്രവേശന കവാടത്തില്, ഫുജൈറ കോടതിക്ക് മുന്നിലൂടെയുള്ള ഖലീഫ സ്ട്രീറ്റിലുടെ വാഹനങ്ങള് പോകുമ്പോള് ബീഥോവന്റെ ഒമ്പതാം സിംഫണിയുടെ ഈണം കേള്ക്കാനാവും. 750 മീറ്റര് ദൈര്ഘ്യമാണ് ഈ സംഗീത റോഡിനുള്ളത്.
ഫുജൈറ ഫൈന് ആര്ട്സ് അക്കാദമിയാണ് പദ്ധതിക്ക് പിന്നില്. പൊതു ഇടങ്ങളില് കലപ്രോത്സാഹിപ്പിക്കുക, ദൈനംദിന ജീവിതത്തില് സംഗീതം ഒരു അവിഭാജ്യ ഘടകമാക്കുക എന്ന അക്കാദമിയുടെ ലക്ഷ്യങ്ങളുടെ ഭാഗമായാണ് ഈ പദ്ധതി. താമസക്കാരും സന്ദര്ശകരും ഇത് വലിയ ആവേശത്തോടെയാണ് വരവേല്ക്കുന്നതെന്നും സാധാരണ യാത്രകളെ അപ്രതീക്ഷിതമായ ഒരു കലാ അനുഭവമാക്കി മാറ്റുന്നത് എല്ലാവരും ആസ്വദിക്കുന്നുവെന്നും അധികൃതര് പറഞ്ഞു.
യാത്ര ചെയ്യുമ്പോള് പോലും അസാധാരണമായ നിമിഷങ്ങള് സൃഷ്ടിക്കാന് കഴിവുള്ള ഒരു സാര്വത്രിക ഭാഷയാണ് സംഗീതം എന്ന് കരുതന്നതിലൂടെയാണ് ഈ പദ്ധതി രൂപപ്പെട്ടതെന്ന് ഫുജൈറ ഫൈന് ആര്ട്സ് അക്കാദമി ഡയറക്ടര് ജനറല് അലി ഉബൈദ് അല് ഹാഫിതി പറഞ്ഞു.
Related News
