റിയാദ്: അധിനിവേശ വെസ്റ്റ് ബാങ്കില് ഇസ്രായേല് പൂര്ണ്ണ പരമാധികാരം പ്രയോഗിക്കുമെന്ന ഇസ്രായേല് മന്ത്രി യാരിവ് ലെവിന്റെ പ്രസ്താവനയെ സൗദി അറേബ്യ ശക്തമായി അപലപിച്ചു. 'പലസ്തീന് പ്രദേശത്തിന്മേല് പരമാധികാരം ഏര്പ്പെടുത്തണമെന്ന് ആഹ്വാനം ചെയ്യുന്ന ഇസ്രായേലിന്റെ പ്രസ്താവനയെ രാജ്യം അപലപിക്കുന്നു' വിദേശകാര്യ മന്ത്രാലയം പറഞ്ഞു.
അത്തരം നടപടി അന്താരാഷ്ട്ര നിയമങ്ങളുടെ ലംഘനമാണ്. പലസ്തീന് ഭൂമിയില് കുടിയേറ്റം വ്യാപിപ്പിക്കാനുള്ള ഏതൊരു ശ്രമത്തെയും സൗദി അറേബ്യ എതിര്ക്കും. അന്താരാഷ്ട്ര പ്രമേയങ്ങള് പാലിക്കാന് ഇസ്രായേല് തയാറാവണമെന്നതാണ് രാജ്യത്തിന്റെ തങ്ങളുടെ നിലപാടെന്ന് സൗദി വ്യക്തമാക്കി. വെസ്റ്റ് ബാങ്കിലുടനീളം ഇസ്രായേല് പരമാധികാരം പ്രയോഗിക്കേണ്ട സമയം വന്നിരിക്കുന്നുവെന്നായിരുന്നു ഇസ്രായേല് നീതിന്യായ മന്ത്രി യാരിവ് ലെവിന് പറഞ്ഞത്.
1967 ല് ഇസ്രായേല് വെസ്റ്റ് ബാങ്കും കിഴക്കന് ജറുസലേമും കൈവശപ്പെടുത്തി, അന്താരാഷ്ട്ര നിയമപ്രകാരം നിയമവിരുദ്ധമെന്ന് കരുതപ്പെടുന്ന ഡസന് കണക്കിന് കുടിയേറ്റ കേന്ദ്രങ്ങള് പ്രദേശത്തുടനീളം നിര്മ്മിച്ചു. പലസ്തീന് ജനതയുടെ നിയമാനുസൃത അവകാശങ്ങള് പുനഃസ്ഥാപിക്കുന്നതിലും കിഴക്കന് ജറുസലേം തലസ്ഥാനമായി 1967 ലെ അതിര്ത്തികളില് ഒരു പലസ്തീന് രാഷ്ട്രം സ്ഥാപിക്കുന്നതിലുമുള്ള തങ്ങളുടെ പിന്തുണ സൗദി വിദേശകാര്യ മന്ത്രാലയം ആവര്ത്തിച്ചു.
Related News
