പാലക്കാട്: പ്രവാസിയായ പിതാവും മകനും തൂങ്ങി മരിച്ച നിലയില്‍. മനിശ്ശേരി കണ്ണമ്മ നിലയത്തില്‍ കിരണ്‍ (38), മകന്‍ കിഷന്‍ (9) എന്നിവരാണു മരിച്ചത്. കിരണിന്റെ ഭാര്യ അഖീന ഒന്നര മാസം മുന്‍പ് ഇതേ വീട്ടില്‍ ഇതേ മുറിയില്‍തന്നെ തൂങ്ങി മരിച്ചിരുന്നു. അഖീന മരിച്ച 51ാം നാളില്‍ അതേ മുറിയില്‍ അതേ ഭാഗത്താണു ഭര്‍ത്താവ് കിരണും മകന്‍ കിഷനും മരിച്ചത്. ഇതോടെ ഒരു കുടുംബം ഒന്നടങ്കം ഇല്ലാതായി.

മകനെ തൂക്കി കൊലപ്പെടുത്തിയ ശേഷം അച്ഛന്‍ തൂങ്ങിമരിച്ചതാണെന്നാണു പൊലീസിന്റെ പ്രാഥമിക നിഗമനം. മനിശ്ശേരിയിലെ വീട്ടില്‍ വൈകിട്ട് അഞ്ചോടെയാണ് ഇരുവരെയും മരിച്ച നിലയില്‍ ബന്ധുക്കള്‍ കണ്ടെത്തിയത്. കിരണിന്റെ ഭാര്യ അഖീന ഇതേ വീട്ടില്‍ കഴിഞ്ഞ മേയ് 14നാണ് തൂങ്ങിമരിച്ചത്. വിദേശത്ത് ജോലിചെയ്തിരുന്ന കിരണ്‍ ഭാര്യയുടെ സംസ്‌കാരച്ചടങ്ങുകള്‍ക്കു ശേഷം ജൂണ്‍ 8നു മടങ്ങിയെങ്കിലും വ്യാഴാഴ്ച രാത്രി വീണ്ടും നാട്ടിലെത്തുകയായിരുന്നു. മായന്നൂര്‍ പാറമേല്‍പടിയില്‍ സഹോദരിയുടെ വീട്ടിലായിരുന്ന മകനെ കൂട്ടി വെള്ളിയാഴ്ച രാവിലെ പതിനൊന്നോടെയാണു മനിശ്ശേരിയിലെത്തിയത്. സമീപത്തെ ബന്ധുവീട്ടില്‍ പോയശേഷം സ്വന്തം വീട്ടിലേക്കു കയറി. പിന്നീടു മൂന്നരയോടെ വീടിന്റെ മുന്നിലെ വാതില്‍ മാത്രം പൂട്ടി താക്കോല്‍ ബന്ധുവീട്ടില്‍ ഏല്‍പിച്ച ശേഷം യാത്ര പറഞ്ഞു മടങ്ങി. പിന്നീടു വീണ്ടും ഇരുവരും തിരിച്ചെത്തുകയായിരുന്നു. വൈകിട്ട് അഞ്ചോടെ കിരണിന്റെ സ്‌കൂട്ടര്‍ പുറത്തു നിര്‍ത്തിയിട്ടതു കണ്ട ബന്ധുക്കള്‍ പിന്‍വാതിലിലൂടെ കയറി പരിശോധിച്ചപ്പോഴാണു വീടിന്റെ ഒന്നാം നിലയില്‍ ഇരുവരെയും തൂങ്ങി മരിച്ച നിലയില്‍ കണ്ടെത്തിയത്.

കിഷന്‍ പാറമേല്‍പടിയിലെ സ്‌കൂളില്‍ നാലാം ക്ലാസ് വിദ്യാര്‍ഥിയാണ്. മരിക്കുന്നതിനു മുന്‍പ് കിഷന്‍ നേരത്തെ പഠിച്ചിരുന്ന സ്‌കൂളിലെത്തി പഴയ കൂട്ടുകാരെയും അധ്യാപകരെയും കണ്ടിരുന്നു. മരണ കാരണം വ്യക്തമല്ല, ഭാര്യയുടെ വേര്‍പാടിലുള്ള വേദനയാവാം കിരണിനെ മകനെ കൊലപ്പെടുത്തിയ ശേഷം തൂങ്ങി മരിക്കാന്‍ പ്രേരിപ്പിച്ചതെന്ന് സംശയിക്കുന്നു.