റിയാദ് - ഭൂപടങ്ങളോ ദിശാസൂചക ഉപകരണങ്ങളോ ഇല്ലാതെ മരുഭൂമിയിലൂടെ വഴി കണ്ടെത്താന് അസാമാന്യ കഴിവുള്ള ഒരു ജനതയുണ്ട് സൗദി അറേബ്യയില്- അല്-മാഅക്ല ഗോത്രം! താരിഫ് അല്-മാഅക്ലിയുടെ പിന്ഗാമികളായ ഈ ഗോത്രത്തിന്റെ തനതായ ഈ കഴിവ് 'എം.ബി.സി ഇന് എ വീക്ക്' പരിപാടിയിലൂടെയാണ് ലോകമറിഞ്ഞത്.
ഷമ്മാര് ഗോത്രത്തിലെ പ്രമുഖ അംഗങ്ങളില് ഒരാളായ ഖസാല് അല്-മാഅക്ലി ഈ കഴിവിന് ജീവിക്കുന്ന ഉദാഹരണമാണ്. അദ്ദേഹം പറയുന്നത് കേള്ക്കൂ: 'ഞങ്ങള്ക്ക് കോമ്പസോ ജി.പി.എസോ ആവശ്യമില്ല. ആദ്യ ചുവടുവെപ്പില് തന്നെ അടയാളങ്ങള് ഞങ്ങള്ക്കറിയാം. വര്ഷങ്ങള്ക്ക് ശേഷം തിരികെ വരുമ്പോഴും ഞങ്ങള് അവിടെ നിന്ന് പോയിട്ടില്ലാത്തത് പോലെയാണ്.'
മരുഭൂമിയിലെ ഓരോ ചെറു വിവരങ്ങളും ഓര്മ്മിക്കാനുള്ള അസാധാരണമായ ഓര്മ്മശക്തിയും മാനസിക ശേഷിയും അല്-മാഅക്ല ഗോത്രത്തിനുണ്ട്. കൂടാതെ, ഏറ്റവും കഠിനമായ കാലാവസ്ഥയെ അതിജീവിക്കാനും ഇവര്ക്ക് കഴിയും. സൗദി ജിയോളജിക്കല് സര്വേ പോലുള്ള ഔദ്യോഗിക സ്ഥാപനങ്ങള് പോലും രാജ്യത്തിന്റെ വടക്കന് ഭാഗങ്ങളിലെ സ്ഥലങ്ങള് തിരിച്ചറിയാന് ഇവരുടെ സഹായം തേടാറുണ്ട്.
ഒരിക്കല് നടന്ന രസകരമായ ഒരു സംഭവം ഖസാല് പങ്കുവെച്ചു. 30 കിലോമീറ്ററിനപ്പുറം ഉപേക്ഷിച്ച ഒരു വാട്ടര് ക്യാനിന്റെ അടുത്തേക്ക് തിരികെ കൊണ്ടുപോകാന് സുഹൃത്തുക്കള് അദ്ദേഹത്തെ വെല്ലുവിളിച്ചു. എന്നാല്, കൃത്യം ആ സ്ഥലത്ത് തന്നെ അവരെ തിരികെ എത്തിച്ച് ഖസാല് സുഹൃത്തുക്കളെ ഞെട്ടിച്ചു! 'നഗരത്തില് എനിക്ക് വഴി തെറ്റിയേക്കാം, പക്ഷേ മരുഭൂമിയില് ഇല്ല. ഈ സ്ഥലം ഞങ്ങളെയും ഞങ്ങള് ഈ സ്ഥലത്തെയും അറിയും,' അദ്ദേഹം ഉറപ്പിച്ചു പറയുന്നു. മരുഭൂമിയിലെ രാജാക്കന്മാര് എന്ന് ഇവരെയല്ലാതെ ആരെയാണ് വിശേഷിപ്പിക്കുക.
