ഗസ്സസിറ്റി: വടക്കന് ഗസ്സയില് ഹമാസ് നടത്തിയ ബോംബ് ആക്രമണത്തില് അഞ്ച് ഇസ്രായേല് സൈനികര് കൊല്ലപ്പെട്ടു. 10 സൈനികര്ക്ക് പരിക്കേറ്റു. രണ്ടുപേരുടെ നില ഗുരുതരമാണ്. ഒരു സൈനികനെ കാണാതായെന്നും റിപ്പോര്ട്ടുണ്ട്.ഹമാസ് സായുധ വിഭാഗമായ അല്ഖസ്സാം ബ്രിഗേഡ് സൈനിക വാഹനത്തില് ഘടിപ്പിച്ച സ്ഫോടകവസ്തു പൊട്ടിത്തെറിച്ചാണ് അപകടം. ഒരു കവചിത വാഹനത്തിന് പുറമെ രക്ഷാ ദൗത്യവുമായെത്തിയ സൈനിക വാഹനങ്ങള്ക്ക് നേരെയും ഹമാസ് ആക്രമണം നടന്നതായി ഇസ്രായേല് മാധ്യമങ്ങള് റിപ്പോര്ട്ട് ചെയ്തു.
വടക്കന് ഗസ്സയിലെ ബൈത്ത് ഹാനൂനില് തിങ്കളാഴ്ച രാത്രി പത്ത് മണിക്ക് ശേഷമാണ് ബോംബ് സ്ഫോടനമുണ്ടായതെന്ന് ഇസ്രായേല് സൈന്യം അറിയിച്ചു. ജറുസലേം സ്വദേശികളായ സ്റ്റാഫ് സാര്ജന്റ് മെയര് ഷിമോണ് അമര് , സര്ജന്റ് മോഷെ നിസ്സിം ഫ്രെച്ച് , ബിന്യാമിന് അസുലിന്, നോം അഷറോണ് മുസ്ഗാദിന് തുടങ്ങിയവരാണ് കൊല്ലപ്പെട്ട സൈനികര്. സൈനികര് കാല്നടയായി സഞ്ചരിക്കുന്ന സമയത്താണ് സ്ഫോടനമുണ്ടായതെന്നാണ് ഐഡിഎഫ് വിശദീകരണം. വ്യോമാക്രമണത്തിന് ലക്ഷ്യമിട്ട സ്ഥലത്തായിരുന്നു സ്ഫോടനം നടന്നതെന്നും സൈന്യം വ്യക്തമാക്കി.
അതിനിടെ, യമനിലെ കേന്ദ്രങ്ങളില് ഇസ്രായേല് നടത്തിയ വ്യോമാക്രമണത്തിന് ഹൂതികള് തിരിച്ചടിച്ചു . ഇസ്രായേലിനു നേരെ മിസൈല് വര്ഷിച്ചതിനു പുറമെ ചെങ്കടലില് ഒരു കപ്പലിനു നേരെയും ഹൂതികള് ആക്രമണം നടത്തി. രണ്ട് കപ്പല് ജീവനക്കാര്ക്ക് പരിക്കേല്ക്കുകയും രണ്ട് പേരെ കാണാതാവുകയും ചെയ്തു. കഴിഞ്ഞ ദിവസം തങ്ങള് ആക്രമിച്ച 'മാജിക് സീസ്' എന്ന ചരക്കുകപ്പല് കടലില് മുങ്ങിയതായും ഹൂതികള് അവകാശപ്പെട്ടു.
അതേസമയം, ഗസ്സയില് ഇസ്രായേല് ആക്രമണം തുടരുകയാണ്. കഴിഞ്ഞ ദിവസം ആക്രമണത്തില് 61 പേര് കൊല്ലപ്പെട്ടു. ഭക്ഷണത്തിന് കാത്തുനിന്നവര്ക്കു നേരെ നടന്ന വെടിവെപ്പില് ഇന്നലെയും അഞ്ചുപേരാണ് കഴിഞ്ഞദിവസം കൊല്ലപ്പെട്ടത്.
ഗസ്സ വെടിനിര്ത്തലുമായി ബന്ധപ്പെട്ട് ദോഹയില് കഴിഞ്ഞ ദിവസം ചര്ച്ച തുടങ്ങിയിരുന്നു. ഇസ്രായേല് പ്രതിനിധി സംഘം ദോഹയിലെത്തി. യു.എസ് പ്രസിഡന്റ് ഡോണള്ഡ് ട്രംപ് മുന്നോട്ടുവെച്ച രണ്ടുമാസത്തെ വെടിനിര്ത്തല് നിര്ദേശത്തിലാണ് ചര്ച്ച. ഇക്കാലയളവില് യുദ്ധവിരാമം സംബന്ധിച്ച് ചര്ച്ച നടത്തും.
ഇതിനോട് അനുകൂലമായി പ്രതികരിച്ച ഹമാസ്, യുദ്ധവിരാമത്തെക്കുറിച്ചും ഇസ്രായേല് സൈനികര് ഗസ്സ വിടുന്നത് സംബന്ധിച്ചും ഉറപ്പുലഭിക്കണമെന്ന് ആവശ്യപ്പെട്ടു. ഗസ്സയില് ഭക്ഷണ വിതരണം യു.എന് ഏജന്സിക്ക് കീഴിലാക്കണമെന്നും ഇസ്രായേല് സൈനിക സാന്നിധ്യം കരാറില് അംഗീകരിച്ച ഭാഗങ്ങളില് മാത്രമാകണമെന്നും ആവശ്യപ്പെട്ടു.
അതേസമയം, ഇസ്രായേല് പ്രധാനമന്ത്രി ബിന്യമിന് നെതന്യാഹു യു.എസ് പ്രസിഡന്റ് ട്രംപുമായി കൂടിക്കാഴ്ചക്ക് വാഷിങ്ടണിലെത്തി. സന്ദര്ശനത്തിനിടെ ട്രംപിനെ സമാധാന നൊബേലിന് ഇസ്രായേല് ശിപാര്ശ ചെയ്തതായി നെതന്യാഹു ട്രംപിനെ അറിയിച്ചിരുന്നു. നാമനിര്ദേശത്തിന്റെ പകര്പ്പ് വൈറ്റ് ഹൗസില് നടന്ന ഡിന്നറിനിടെ നെതന്യാഹു ട്രംപിന് കൈമാറി. അദ്ദേഹം ഒന്നിനെ പിറകെ ഒന്നായി ഒരു മേഖലയിലെ രാജ്യങ്ങളില് സമാധാനം കെട്ടിപ്പടുക്കുകയാണെന്ന് നെതന്യാഹു പറഞ്ഞു.
Related News
