ദോഹ:ജിസിസി രാജ്യങ്ങളെ ബന്ധിപ്പിക്കുന്ന റെയില് പാത നിര്മ്മിക്കുന്നതിനുള്ള കരട് കരാറിന് അംഗീകാരം നല്കി ഖത്തര് മന്ത്രിസഭ. ഖത്തര് ഉപപ്രധാനമന്ത്രിയും പ്രതിരോധ സഹമന്ത്രിയുമായ ഷെയ്ഖ് സൗദ് ബിന് അബ്ദുള്റഹ്മാന് ബിന് ഹസ്സന് അല്താനിയുടെ നേതൃത്വത്തില് നടന്ന യോഗത്തിലാണ് കരാറിന് അംഗീകാരം നല്കിയത്.
ഗള്ഫ് സഹകരണ കൗണ്സിലിലെ ആറ് രാജ്യങ്ങളെ ഒരു സംയോജിത റെയില്വേ ശൃംഖലയിലൂടെ ബന്ധിപ്പിക്കാനുള്ള അഭിലാഷ പദ്ധതിയില് ഖത്തറിന്റെ സജീവ പങ്കാളിത്തത്തിന് വഴിയൊരുക്കുന്നതാണ് ഖത്തര് മന്ത്രിസഭയുടെ നീക്കം. ഏകദേശം 2,117 കിലോമീറ്റര് ദൈര്ഘ്യമുള്ള റെയില്വേ പദ്ധതി, കുവൈത്ത് സിറ്റിയില് നിന്ന് ആരംഭിച്ച് സഊദി അറേബ്യയിലെ ദമ്മാമിലൂടെ കടന്ന്, രണ്ട് സമുദ്ര പാലങ്ങള് വഴി ബഹ്റൈനിലേക്കും ഖത്തറിലേക്കും ശാഖകളായി വ്യാപിക്കും. തുടര്ന്ന് ഖത്തറില് നിന്ന് അബൂദബി വഴി യുണൈറ്റഡ് അറബ് എമിറേറ്റ്സിലേക്കും, ഒടുവില് ഒമാനിലെ മസ്കത്തില് എത്തിച്ചേരും.
ജിസിസി റെയില്വേ ശൃംഖല, ഗള്ഫ് രാജ്യങ്ങള്ക്കിടയില് വ്യാപാരം, സാമ്പത്തിക സംയോജനം, സാമൂഹിക ബന്ധങ്ങള് എന്നിവ ശക്തിപ്പെടുത്തുന്ന ഒരു പരിവര്ത്തന പദ്ധതിയായാണ് ജിസിസി റെയില് പദ്ധതി രൂപകല്പ്പന ചെയ്തിരിക്കുന്നത്. പദ്ധതി പൂര്ത്തിയാകുന്നതോടെ, യാത്രക്കാര്ക്ക് ആധുനികവും സുസ്ഥിരവും കാര്യക്ഷമവുമായ ഗതാഗത മാര്ഗം ലഭ്യമാകും. ഇത് റോഡ് ഗതാഗതത്തെ ആശ്രയിക്കുന്നത് കുറയ്ക്കുകയും വൈവിധ്യവും പ്രതിരോധശേഷിയുമുള്ള സമ്പദ്വ്യവസ്ഥകള്ക്കായുള്ള ജിസിസിയുടെ പങ്കിട്ട ദര്ശനത്തെ പിന്തുണയ്ക്കുകയും ചെയ്യും.
ഖത്തര് ദേശീയ ദര്ശനരേഖ 2030-ന്റെ ഭാഗമായി, സാമ്പത്തിക വൈവിധ്യവല്ക്കരണവും അടിസ്ഥാന സൗകര്യ വികസനവും പ്രാദേശിക ബന്ധങ്ങള് ശക്തിപ്പെടുത്താനും ലക്ഷ്യമിടുന്ന ഈ പദ്ധതിയില് ഖത്തര് സജീവമായി പങ്കാളിയാകുന്നു. അയല്രാജ്യങ്ങളുമായുള്ള സഹകരണം വര്ധിപ്പിക്കാനും പ്രാദേശിക ലോജിസ്റ്റിക്സ്, ഗതാഗത കേന്ദ്രമെന്ന നിലയില് സ്വന്തം സ്ഥാനം ശക്തമാക്കാനുമുള്ള ഖത്തറിന്റെ പ്രതിബദ്ധത ഈ പദ്ധതി അടിവരയിടുന്നു.
അതിര്ത്തി കടന്നുള്ള വ്യാപാരം വര്ധിപ്പിക്കുകയും ചരക്കുകളുടെയും സേവനങ്ങളുടെയും സുഗമമായ ഗതാഗതം ഉറപ്പാക്കുകയും ചെയ്യും.ഗള്ഫ് രാജ്യങ്ങള്ക്കിടയില് എളുപ്പവും വേഗതയേറിയതുമായ യാത്ര സാധ്യമാക്കി ടൂറിസവും സാംസ്കാരിക വിനിമയവും പ്രോത്സാഹിപ്പിക്കുന്നത് കൂടിയാണ് പദ്ധതി.
Related News
